Thmu kem ki pulit sa ia u nong kiew lum ba paw ka jylla Shah kynnoh kawang petrol bom

Shillong,20 Risaw:
U Wallambok Lyng doh-Marshillong, u dei u nongkiew lum ba paw khmat ha ka jylla, hynrei lai bnai mynta um shym la don ing, namar ba u leit ban pyndep ia ka jinghikai kiewlum jong u ha ka jylla Jharkhand, kaba la ai jinghikai ryngkat bad ki tnad shipai ha kaba u dang shu wan phai ing dang ar sngi mynta. Hynrei tang na ka daw ba utei u nongkiew lum ka jylla um shym la don ha ing ki pulit ki la tharai sniew ia u da kaba kynnoh ba u dei uba donkti ha ki kam thang kali, kawang petrol bomb bad kiwei ki kam runar.Ka jingtharai sniew ki pulit ka la poi sa shaduh u pud ba ki la leit ban khynra ia u ha ka ing sah jong u hi kaba don ha Upper Lumparing.
Ha katei ka jingleit khynra ia utei u nongkiew lum ka jylla, ki pulit kim shym la lap ia u namar ba um don ha ing, hynrei ki la lap ia u para jong u u Lakitbok Lyngdoh Marshillong ha kaba ki la kem ia u, kane ka jingjia ka la jia ha ka miet sngi thohdieng. U Lakitbok ruh u dei u samla uba ju ia shim bynta ha ka kam kiew lum bad u don bynta ruh bad ka seng ki nongkiewlum ka Meghalaya Rock Climbing and Mountaineering Association ( MeRC& MA) ha kaba u Wallambok u dei u General Secretary jong kane ka seng.
U Wallambok u la iathuh ba ki pulit SOT ki la wan sha ing sah jong u bad ki la kylli beit beit ia ka kyrteng jong u da kaba kynnoh ba u dei u ba donkti ha ki wiang ding ha Laban bad ha Lumparing. U la ong ba kumba 20 ngut eiei ki pulit ki la wan sha katei ka ing sah jong u.
“ Ha kata ka por ba ki pulit SOT ki wan kumba saw kali, ngam don ha ïing hynrei don u para jong nga bad ki bahaiing. Hadien ba ki pulit ki la kylli shaphang jong nga bad namar ba ngam don ha iing, ki la rah pynban ia u Lakitbok ryngkat ka shoh ka dat bad set ia u ha along jong ki pulit haduh mynta,” la iathuh u Wallambok..
Une u nongialam ka u la iathuh ba u la iakren ruh bad u SP ka East Khasi Hills u Bah M Kharkrang halor kane ka jingleh jong ki pulit khamtam ka jingwan jong ki da ki phew ngut ban wan wad ia u ha iingsah jong u. “ Ki pulit kiba teh jaiñ iong ki la wan wad beit beit ia nga hynrei na ka liang u SP pat u la phah sa ka SMS bad pynshai ba ki pulit kim shym la wan satia ban thwet ne kem ia nga,” la ong u Wallambok.
U Wallambok u la ong ba u para jong u ruh u dei u nongkiewlum bad u u la kynnoh ba ki pulit ki la kem ia u khlem nongrim ha kaba u la ong ruh ba un ym shongthait ban ia khun namar ka jingkem ba khlem nongrim ia u para jong u.