Pyniakhlad ia ka kam bishar bad ka Sorkar

Shillong, 20 Risaw:
Ka sorkar ka dang thmu ban pyniakhlad noh ia ka Judiciary na ka Executive ha ki ar tylli ki district ha ka jylla bad kane kan sdang noh lashem snem.
“Ngi thmu ban pyndep ia kane ka jingpyniakhlad ia ka Judiciary na ka Executive ha Williamnagar, ka East Garo Hills bad ka Nongstoin ka West Khasi Hills,” la ong u Symbud Myntri Rangbah ba peit ia ka tnad kam ain u Bah Rowell Lyngdoh ha kane ka sngi Saitjain.
U la ong ba haduh mynta, ka jingpyniakhlad ia ka Judiciary na ka Executive la pyndep ha East Khasi Hills, West Jaintia Hills, Ri-Bhoi bad West Garo Hills.
“Ngin leh ia kane ha kiwei kiwei ki district ba dang sah” la ong u Bah Rowel.
Nalor kane, 14 tylli ki kam Judicial Officer yn thung ka sorkar kynthup ruh ia Chief Judicial Magistrates, District and Session Judge, Judicial Magistrate First Class bad Civil Judges (Junior Division) ha baroh ki district.