Leit jngoh jaka saitjain U bah Process ha Mawlai

Shillong,20 Risaw:
Ka jaka saitjain ha Ummawleiñ, Mawlai Syllaika riah, ka dei ka jaka ba palat ngut ki nongsait jain nong ka shnong Mawlai ki wan sait jain ha katei ka jaka bad dei lyngba katei ka kam ba ki ju im ja kpoh ban pyndap ia ka ing ka sem jong ki. Hynrei kaba phylla ka long ba ia katei ka jaka siatjain ha mawlai Syllai kariah, ym pat ju don ki nongmihkhmat ka Mawlai ki ban wan jngoh ban tip kaei ka jingeh ki nongsaitjain ha katei ka jaka ka bym biang tang ka lynti iaid kjat ruh, myn ha ka sngi saitjain u MLA barim ka Mawlai u Bah P.T Sawkmie da ladei u la hiar sha katei ka jaka ban jurip bad ban iohi da la ki jong ki khmat ia ka jingeh ki padidbah ka shnong Mawlai.
Katei ka jaka saitjain ka dei kaba ki nongsaitjain na kylleng ka Mawlai kynthup na Syllaikariah, Motsyiar, Nonglum bad Umjaiur, kila im ja na ka kam saitjaiñ nong hapoh ki pung ka Lum Ummawleiñ bad i Wahduid jong ka Umladew hynrei kine ki nong saitjaiñ kiba dei ki Longkmie, kila shem shibun ki jingeh haba saitjaiñ ha kine ki jaka namar ka jingbym biang ki jaka sait jaiñ, ki lynti iaid kiba biang bad kiwei kiwei. Ha katei ka jingleit jurip u Bah Process u la kular ia ki longkmie ka mawlai ba un pynshna dalade hi ia katei ka jaka saitjain hangtei hynrei u la kyntu ia ki ba kin ia kren bha shuwa bad ki nongpyniaid shnong ka Syllaikariah bad Umjaiur shuwa ban noh ki jingiarap. Lah ban kdew ba ki la mih bun ki jingkular na kiba bun ki nongmihkhmat ka Mawlai halor katei ka pung saitjain ha kaba ka jingkular jong ki ka long ym tang ban pynbha ia ka pung saitjain hynrei ban pynthied syndon da ka Washing Machine ia baroh khnang ba kin ym saitjain shuh.
Ka Ummawleiñ ka don artylli ki pung ba kyrsoi um na ramew hynrei kawei na kine ki pung, kala jakhlia bha namar ka jingwan tuid jong ka Nala na ka shnong Mawlai Motsyiar bad Syllaikariah katba kawei pat ka dei ka pung ha khap synrang maw kaba jyndong bad ba rit bha. Ka jingeh hangne ka long ba kane ka jaka kam don ia ka jaka saitjaiñ ba biang hynrei la shu kynton bad siang hi da ki maw tang ban long sait.