Shah kem u heh FKJGP na Kyrbom, kurup ia ka Ambulance 8sngi yn tohkit ki pulit

Shillong,18 Risaw:
Mynhynin mynstep, ki pulit ki la kem ia u nongialam ka FKJGP u Reginald Thabah , 32 snem karta. U bah Thabah u dei u Asstn. Information Secretary ka FKJGP, Central Body . La kem ia utei u nongialam sengbhalang na Sngithiang, Kyrbom, Maw prem . U SP ka East Khasi hills Bah M H Kharkrang u la iathuh ba la kem ia utei u nongialam napoh kali kit nongpang ka FKJGP kaba don ia u nombar ML 05 J 3341 ha ka por miet katba ki dang shang tawiar ban thaw jingkulmar bad ban leh ia ki kam runar.
Shuh shuh ki pulit ki la iathuh ba la leit ialam ia u Bah Thabah sha Ingbishar mynta ka sngi, ha kaba ka ing bishar ka la ai bor ba un shah tohkit 8 sngi ha ki pulit. Ki pulit ki la kurup ruh ia katei ka kali kit nongpang, kaba la pyndonkam da U bah Reginald.
Lah ban kdew ba ki pulit ki la thwet jur ban kem ia ki nongialam sengbhalang ha kine ki sngi ba jur ka ia khih ILP, ha kaba kim shym la ioh kem ia ki nongialam ba ha khmat ki sengbhalang dei tad mynta ka sien ba nyngkong ba ki la ioh ban kem ia u Asstn. Information Secretary ka FKJGP, Central body.