Shah kem arngut bad ki jri, thang ar ki thuk thuk ha Lumparing

Shillong, 17 Risaw:
Hynne shiteng miet ha ka por kumba 1.30 baje ei ei, ki briew bym lah ban tip, ki la thang ia ki artylli ki thuk thuk ha ka dong Mynsain, Lumparing da kaba kawang da ki ar tylli ki bilor petrol bom.
Kine ki ar tylli ki thuk thuk kiba la shah thang ki kynthup ia kawei ka thuk thuk Pulsar bad kawei pat thuk thuk Discover kiba la pynieng marjan ha ka juh ka phyllaw iing.
Ka thuk thuk pulsar ka la ing na ka bynta ba shapoh bad kawei pat ka dei ka thuk thuk Discover kaba don ia u number ML-05 J-4963 kaba la ing na ki bynta jong ka jaka shong ba shadien.
Ha katei ka jaka la lap ia ki ar tylli ki bilor petrol bom kiba la kdew shai ba ki runar ki la kawang da ki petrol bom bad kine ki thuk thuk kiba la shah thang la pynieng ha phyllaw iing jong u Sisi Sarkar, kaba don ha ka Dong Mynsain, Lumparing.
Na ka liang jong ki pulit ki leit sha katei ka jaka ban pynlong ia ka jingtohkit ban lap ia kiba donkti halor kane ka jingjia bad haduh ba thoh ia kane ka khubor ym pat ioh kem iano iano ruh.
Ha kawei pat ka khubor, la iathuh ba katba ka pakhang shnong ki sengbhalang ka dang treikam ki pulit mynta ka sngi ki la kem ia ar ngut ki briew kiba la tip kyrteng kum u Thrangbor Nongrum , 32 snem karta uba dei na Kyrbom Mawprem bad u Shemlad Nongrum, 34 snem uba dei na Wahingdoh. La kem ia kitei na Lawmali. U SP ka East Khasi Hills u Bah MH Kharkrang u la iathuh ba na kitei ki ar ngut kiba la shah kem la ioh ban kurup ar tylli ki jri siat sim, ki maw siat sim kiba ka jingheh kat marble, bad ka kyiad 180 ml.