Ther u nongialam ka KHNAM, ba iaid proseshon ki pulit

Shillong,14 Risaw:
La iohi ba ha kine ki sngi ka nongbah Shillong ka la khapngiah tang da ki pulit pahara ha manla ki dong jong ka, bad ym tang da ki pulit pahara kumba ju long ha ki por ba la dep, hynrei la iohi ruh ba la iaid proseshon sa da ki pulit teh jain iong ban pynkhlain ia ka jingpahara ha nongbah. Lah ban ong ba haduh kattei ka jingpahara ki pulit ha nongbah Shillong ka dei na ka dawbah ILP kaba la khih win ha kine ki sngi mynta.
U Working president ka KHNAM, u Bah Adelbert Nongrum haba ia kren bad u Rupang u la ong ba katei ka jingleh ka sorkar ban phah iaid pulit pahara ha baroh sawdong ka nongbah Shillong ka dei tang ka jingkhawpud jong ka bad ka bym don nongrim eiei ruh em . U Bah Bah Adelbert u la ong ruh ba ki sengbhalang kim dei kiba kieng kieng atiar, hynrei balei ka sorkar ka la thwet ia ki, ha katei ka rukom, pynpaw u Working president ka KHNAM ia ka jingsngewlyngngoh ia ka rukom thwet ki pulit ia ki nongialam sengbhalang.
Shuh shuh utei u nongialam ka KHNAM ha kajuh ka por uba long ruh u MDC ka Jaiaw u la ong ba ka KHNAM ka la nan pynkhlain shuh shuh ban pyniar ia ki tnad treikam jong ka kum shibynta ban pynkhreh ruh ia ka jingiakhih na ka bynta ban pynkhlain ia ka jingdawa ILP kaba ki seng sainpyrthei, ki sengbhalang ki dang iai dawa naka sorkar jylla haduh kine ki sngi.
Haba la kylli hato ka la don ne em ka jingbyrngem na ka liang ka sorkar ban kem ia ki MLA ne MDC kiba donkti ban kynshoit ia ki sengbhalang ha kine ki jingiakhih ILP, u Bah Adelbert u la ong ba um pat ioh sngew eiei haduh mynta, hynrei u la ong ba watla ka long kumta u ong ba kin ym kynran dien namar baroh khoit ka bor ka shong ha u paidbah bad u paidbah u don ka jingshisha ban dawa ia ka hok, pynkut u Bah Adelbert.
Mynta ka sngi ka KHNAM ka la pynlong ia ka jingialang nongkitkam jong ka ha kaba la jied ia u Bah Lurshai Lyngwa kum u President ba thymmai ka KHNAM Youth Wing.