Ym shah shoh dohum ka Narpuh

Shillong,14 Risaw:
Ka Shnong Tong seng (Narpuh) lyngba ka khubor bala pyllait da u ma A. Bamon Rangbah Shnong ka la pynmih ia ka hukum bad jingmana ba yn ym shah ia kino kino ki riew shim kabu ba kin pyniap pathar ia ki dohum da kaba shoh dawai ne thang bom. Na ka liang jong u ma Bamon ula ong ba ha kine ki khyndiat por ka shnong kala ioh jingtip ba ki don katto katne ki riew shim kabu kiba la wan ban pynjot ia ki dohum kiba don ha ki wah kiba hap hapoh u pud u sam jong ka shnong. Kumta nangne shakhmat lada ka bor shnong ka dang tip ne lap ia ki briew kiba pynjot beain ia ki dohum dohpnat, kan pynshitom kat kum ki kyndon jong ka shnong. Ha ka juh ka por la buh ka jingkyntu ia baroh kiba wan khwai nabar shnong bad napoh shnong ruh ba kin pyndankam tang da kaba khwai bad kohnguh ia ki jingpyniaid jong ka shnong.