Proseshon ki pulit jain iong, la kumba korphiw ka Sor Shillong

Shillong, 13 Risaw:
Da ki phew tylli ki gypsy bad ki thuk thuk jong ki pulit teh jainiong ki la iaid proseshon ha kyl leng ki bynta jong ka
nongbah Shillong kum shi bynta ban khang lad ia kino kino ki jingjia na ki ‘riew shim kabu, kham tam ha kane ka por leh niam puja jong ki ‘riew Hindu.
Ka jingiaid pahara ka long kumba iaid pahara, ha ki por ba don korphiw bad kane ka la pynlyngngoh ia ki briew kiba iohi ia kane.
Ha ka jinglam khmat jong u Superintendent of Police (SP) ka East Khasi Hills u Bah MH Kharkrang, ki kali gypsy ki la iaid tawiar ia
baroh kawei ka nongbah Shillong, khamtam lei sha kito ki jaka ba don ki jing leh niam Puja ne ki puja pandal.
Ki pulit teh jaiñ iong ki la sdang ban iaid naduh ka sngi Thohdieng ba
sdang ka jingleh niam Puja ki riew ngeit Hindu, bad bun ki paidbah, ki la sah ha ka lyngngoh bad ka umdum, ba balei haduh katne katne bad kynsan kynsan la shu wan mih kine ki pulit teh jaiñ iong kumba don ka thma aiu re. Ka jingiaid pahara jong ki pulit da ki phew tylli ki kali ha ryngkat ki thuk thuk ka long kumba ka sor ka don ha korphiw.
Ki pulit ki pynlong ia kane ka jingiaid pahara ban khang lad ioh don ki riew shim kabu wat ha ka jingshisha ki sengbhalang ki la dep pynbna ba la sangeh shwa ia ka jingiakhih ban dawa Inner Line Permit (ILP) naduh ka 10 haduh 16 tarik ban ailad ia ka jingleh niam kan iaid beit.
Kane ka jingiaid ki pulit ka la buh pynban ia kiba bun hapdeng ka jingtieng bad ka nang pynshrai ia ki riew shim kabu. Ha ka jingshisha kum ka sorkar ka la dei ban shim da kiwei ki lad ki lynti, kata da ki kynja kumno ban ai jinghikai ne pynshai sha ki paidbah lyngba ki prokram bapher bapher ban pynsngewthuh, la ong ki katto katne ki paidbah haba pynpaw ia kane ka jingiaid pahara ki pulit.
Ha kajuh ka por, la iathuh ba ka Sorkar Jylla kala khot ia ki Pulit SWAT Commando na Ri-Lum Garo ba kin wan noh mynta sha Shillong na ka bynta ban pynkhlain ia ka jingkhynra ia ki Nongialam jong ki Sengbhalang.
Kine ki SWAT ki ba jan kot spah ngut, ki la wan poi ha ka nongbah Shillong bad mynta ki la bunkam ha ka jingiaid khynra Sengbhalang ha kylleng ki dong ki shnat ka Nongbah Shillong bad kylleng ki jaka ka East Khasi Hills District.