Maham ka Synjuk ki Nongsynshar ba mushlia ki sengbhalang Trei beit, ki kam na Assam ne Meghalaya

Shillong,13 Risaw:
Ka synjuk ki Nongsyn shar Shnong jong ka thain Mawlasnai bad tyrso Gram Sevak Circle, ki ki la ia kynduh ia u Deputy Commissioner, Ri Bhoi hapoh ka jingialam jong u Bah Peter Thongni kum u Sordar jong ka Mawlasnai . Ha katei ka jingleit ia kynduh jong ki ia u DC ka Synjuk ki Nongsynshar shnong ka la ia kren ia u DC halor ki jingeh ba ki paidbah ka thain ki ia kynduh halor ka jingleh donbor ka Assam ha katei ka thain.
Shuh shuh ha katei ka jingleit ia kynduh ia u DC ka synjuk ka la ai ruh ia ka dorkhas kaba ki la dawa ba baroh ki kam pynroi kiba poi ha katei ka thain dei ban pyntrei kam beit la ka dei kaba wan na ka liang ka Assam ne kaba wan na ka liang ka sorkar Meghalaya. Ha ka juh ka por ka synjuk ka la maham tyngeh ruh ia ki sengbhalang ne ki riew shimet kiba leit ban tuklar bad ban khanglad ia ki kam pynroi kiba wan ha ka shnong ka thaw bad ka la ong ba lada ki sengbhalang ne ki riew shimet ne kino kino ki khwan myntoi ki pyrshah ia katei, ka Synjuk ka la byrngem ban leh da kaba tyngeh.
Ha katei ka jingiakynduh bad u DC , Ri-Bhoi ki la buh ruh ka jingkyrpad ha u ban maramot noh ia ka surok na Bhoi rymbong sha mawlasnai bad na Mawlasnai sha Umtngam kiba long ki surok kiba la sniew palat. Ka DC ka la kular ruh ia ki ba kan leh ia kaba donkam bad ka la ong ba ha katei ka shnong Mawlasnai la phah ruh uwei u doktor ba un trei ha ka PHC ba don hangtei hynrei u la kyntait ia katei ka kam bad na ka liang jong ka ka la kular ban shimkhia ia kane.