“Sah ka Bill phiah Constituency ka KHADC ha u Lat”

Shillong, 11 Risaw:
U Myntri ba dei peit ia ka tnad District Council Affiars ka sorkar Jylla, u bah HDR Lyngdoh ula ong ba ka sorkar ka la dep mynjur ia ka bil ban phiah constituency thymmai jong ka KHADC bad la dep phah sha u Lat ka Jylla u Dr KK Paul na bynta ban ai ia ka jingmynjur.
U Bah HDR Lyngdoh u la iathuh ia kane ha ki nongialam ka RBYDSO kiba iakynduh ia u hynne ka sngi ha kamra treikam jongu.
Ia ka Khasi Hills District Council (Constitution of District Council) Admenment Rule 2013 on Delimitation Constituencies KHADC la dep mynjur da ka Iing Dorbar ka KHADC dang shen.
U president ka seng u Bah Dibishon Malai ula iathuh ba u Bah HDR ula pyntip ia ki ba ia katei ka bill ba la dep phah ka sorkar ka ap sa tang ban ioh ka jingmynjur na Lat na bynta ban pyntrei noh ha kane ka elekshon ban wan ha iing dorbar KHADC.
Ha kane ka jingiakynduh ki nongialam ka RBYDSO bad u Myntri ka DCA kaba la khluit ha ka jingiakren, hynrei hadien ka jingiatai sani bha na bynta kane ka kam ki nongialam ki la mynjur ban ap shipor kat haduh ban ioh ia ka rai na u lat ka Jylla bad ka ai khublei ia u Myntri uba la leh ia kaba donkam na bynta ban pynurlong ia katei ka jingdawa jong ka seng, na ka liang u bah HDR ula kyntu ia ki nongialam ka seng ba kin ym pynlong ia kino kino ki jingiakhih na bynta katei ka kam namar ba ka sorkar ka la dep leh ia kaba donkam katkum ka jingdawa jongki.
“Haduh mynta ka sorkar kam pat ioh kano kano ka rai jong u Lat bad katei ka bill ka dangsah kut ha kti u Lat ka Jylla”, la ong u Bah Malai.
U Bah Malai u la iathuh ba u Myntri ka DCA, ula pynthikna ban pyntreikam beit ia kane ka bill mynta u snem bad ka sorkar ruh ka kwah ban pyntreikam ia kane ka bill khnang ba kan pynsuk ban treikam lang ia ki MLA bad ki MDC ha ki kam pynroi hapoh constitwency bad kan iarap ban pynduna ia ka jinglut phut ia ka pisa ha kaba pynkhreh ia ka electoral roll jong ki Constituencies, namar ba dep leh ha ka elekshon MLA kumta lada pyntreikam ia kane ka bill ym donkam shuh ban pynbeit thymmai ia ka electoral roll ha ka elekshon MDC ban wan.
Myntri u la pyntip ba u la dep jubab sha ka Assembly ruh halor ka jingkylli ba la wanrah da u MLA/MDC jong ka Sohra ba ka sorkar ka la dep mynjur ban pyntreikam ia ka Bill jong ka KHADC bad la dep phah sha u lat ka jylla ban ioh ia ka jingmynjur jongu. Katba ka Delimitation bill jong kiwei pat ki District Council ka dang pynkhreh shait shait mynta bad na bynta ka bill jong ka KHADC u Lat ula pynbeit ban iakynduh bad u myntri ha ka 15 tarik mynta u bnai ban bishar bniah ia kane ka bill.