Ba phiah Konstitwensi, yn ia kynduh ki sengbhalang bad RS Jaintia

Shillong,11 Risaw:
Ki sengbhalang baphe bapher jong ka Ri Lum Jaintia kin pynlong ia ka jingia kynduhlang ha ka 14 tarik mynta u bnai ha ka por 3 baje janmiet ha Paradiso Conference Hall Iawmusiang Jowai, halor ka jingthmu phiah Constituencies thym mai (Dilimitatation) ka Jaintia Hills Autonomous District Council(JHADC).
Ki sengbhalang kiba kynthup ia ka Jaintia Youth Federation (JYF), Jaintia Student Union (JSU), Federation of Khasi Jaintia and Garo People (FKJGP), Jaintia People’s Movement Forum (JPMF), Hynniew trep Achik National Movement (HANM), Hynniew trep National People Federation (HNPF), All Jaintia Youth Welfare Organisation (AJYWO) bad ki Rangbah shnong na ki dong bapher bapher jong ka Ri Lum Jaintia.
Ha ka khubor ba la ai da u ma Baitlang Pohsngap President JPMF, u la ong ba ki sengbhalang kin ia kynduhlang ha katei ka sngi na ka bynta ban iakren sani bha ia kane ka kam phiah constituencies ka JHADC namar ka la leh hak dak ha ka por ba lyngkot namar ka jingiakun Elekshon MDC kan long noh shen sa tang saw bnai. Te kumta u paidbah ba bun hi u dangsah ha ka umdum halor ka jingpynbna phiah kyrkieh ka JHADC ia ki Constituencies.
U la ong ruh ba kat kum ka Draft Dilimitation lane ka jingthmu phiah Constituencies ka don shi bun ki jingkylla kham tam ka jingdon briew (Ratio) kam ia ryngkat shuh kawei ia kawei pat bad ka rukom phiah ka la long kyllain palat kam long shuh kat kum ka Geographycal Condition lane ka jinglong jingman jong ki jaka. Shuh shuh u ma Pohsngap u la ong ka jingthmu jong ka JHADC ka la long dier por palat bad ka bym ishong nongrim shuh bad kane ka pynlong tang kum ka jingpynioh nong iano re iano.