U CEO ka Municipal u dei ban risain noh, ong u Bah Sanbor

Shillong, 8 Risaw:
Haba pynpaw ia ka jingsngew bynniaw ia ka jingleh u Chief Executive Officer (CEO) ka Shillong Municipal Board (SMB) u Bah Tableland Lyngwa, u Symbud Lamphang ka iing dorbar u Bah Sanbor Shullai u la ong ba u Bah Lyngwa u dei ban risain noh na ka kam shi syndon.
“Nga la khot jingialang ia u la lai sien, hynrei sngewsih baroh ha kine ki jingialang u CEO ka Municipal um ju wan satia”, la ong u Bah Sanbor haba iashim bynta ha ka motion ba la wanrah da u MLA ka UDP u Bah Jemino Mawthoh hapoh ka iing dorbar hynne ka sngi.
U Bah Sanbor u la ong ba lada dei tang shisien ruh u sngewthuh ba u lah ban bunkam hynrei haba la khot lai sien ruh um poi satia.
“Kane ka dei ka jingbym khein snep ia u nongmihkhmat ba la jied da ki paidbah” la ong u Symbud Lamphang bad kyntu ia ka myntri ba dei peit ban shim khia ia kane ka jingleh u CEO ka Municipal.
“Ngi la khot ia u CEO ka SMB ban iakren halor ki jingeh ha ka constituency jong nga kaba hap ha Municipal,”, la ong u Bah Sanbor.
U Bah Sanbor u la ong ba ka long kaba lyngngoh ba u CEO ka Shillong Cantonment Board, um ju kyntait ne pep hana khot ban iakren ia ki kam katba u CEO ka Municipal pat u long da khongpong.
Haba sngap ia kane ka jingkren u Bah Sanbor, na ka liang u Myntri Rangbah u la ong ba un pan ia ka kaiphod halor ka jingleh jong une u CEO.