Yn sam mobile tablet ka sorkar ia 24 hajar ngut ki samla pule

Shillong, 1 Risaw:
Ka sorkar jylla lashai ka sngi 2 tarik Risaw kan sam ia kumba 24 hajar tylli ki Mobile Tablet sha ki 24 hajar ngut ki samla pule Class XII jong ka jylla baroh kawei bad ia kine ki Mobile yn sam lyngba ka tnad Information and Technology.
Haba iakren bad u bah AL Hek Myntri ka tnad Information and Technology u la iathuh ba, ka sorkar jylla ka la pynkhreh kumba 24 hajar tylli ki Mobile Tablet na ka bynta ban sam sha ki 24 hajar ngut ki samla kiba pule Class XII ha ka jylla baroh kawei.
U la iathuh ba lashai ka sngi yn sdang ban sam shuwa tang ia ki samla pule Class XII kiba don ha East Khasi Hills District bad hadien kane yn sa sam sha kiwei pat ki District h ka jylla.
Na ka liang jong u DC u la iathuh ba ia kane ka prokram ban sam ia kine ki Mobile Tablet sha ki samla pule lashai ka sngi la pynbeit ban pynlong ha madan kaba san ha Polo bad ia kine ki Mobile Tablet yn sam lyngba ka skhim Chief Minister’s Student Digital Learning Aid Scheme-2013-14.
Ki samla pule ki ban ioh ia kine ki Mobile Tablet lashai ka sngi ki kynthup ia ki samla pule Class XII jong ka skul Synod Higher Secondary School, Mission Compound, Sacred Heart Girls Higher Secondary School Mawlai, St. Garbriel, 3 mer, Laban Bengalee Boys, Pine Mount skul, Good Shepherd, Jongksha, St. Anthony’s Shillong, Laitumkhrah Presbyterian, All Saints, Seven Set bad ka BK Bajoria Higher Secondary School.
Nalor ki ophisar sorkar, u Myntri ka tnad IT Bah AL Hek u Myntri Rangbah ka jylla ruh un iadon bynta lang ha kae ka jingsam ia kine ki Mobile Tablet na ka bynta ki khynnah skul jong ka East Khasi Hills District la iathuh u DC, ka East Khasi Hills Shillong, u Sanjay Goyal.