Naduh lashai, ka pakhang surok ba “lai miet kynthih”

Shillong, 29 Nailur:
Ki sengbhalang ki la pynjur ia ka jingiakhih da kaba pynbna biang ia ka pakhang surok miet kaba lai sngi kynthih ban sdang naduh ka 1 tarik haduh 4 tarik u Risaw, 2013, lait noh ha ka 2 tarik ba dei ka shuti.
Kane ka pakhang surokmiet kan sdang naduh ka por 8 baje janmiet haduh 5 baje mynstep ha baroh kine ki lai miet.
Ki sengbhlang ki la pynjur ia ka jingiakhih ban dawa ba ka sorkar ka dei ban pyntreikam beit ia ka Inner Line Permit (ILP) ha ka jylla.
U information & publicity secretary ka FKJGP u Bah Eldie N Lyngdoh u la ong ba kane ka pakhang surokmiet kan treikam ha baroh kine lai miet ha baroh 11 tylli ki district ha kane ka jylla.
Ha kane ka sngi u Blei, u Bah Eldie u la ong ba ki sengbhalang ki la pynjur ia ka jingiakhih ban dawa ia ka ILP ha kane ka jylla. Ki sengbhalang ki la ong ba kane ka sorkar MUA-II ba ialam da ka Congress ka thmu ban wanrah ia ka ain ‘Regulation of Landlords and Tenants Verification Bill’ ka long mar khongpong ia ka jingangnud bad ka jingkwah jong ki paidbah.
Ka sorkar ka la pyneh triang ba kan ym pyntreikam satia ia ka ILP kumba la dawa da ki sengbhalang bad ka la wanrah da kawei ka ain ka Regulation of Landlords and Tenants Verification Bill.
Haba kyntait ia kane ka jingthmu ka sorkar ban wanrah ia kane ka ain, u Bah Eldie u la ong ba ha jaka ba ka sorkar kan pyntreikam ia ka ILP, ka la pynlutkai pynban ia ka por ban wanrah da katei ka ain kaban pynbiang pynbit tang ia ki nongwei kiba wan ban sah ha kane ka jylla.
“Ngi pyrshah jur ia ka jingthmu ka sorkar, bad ngim pdiang ia ka rai ban wanrah ia ka RLTV Bill ha ka jylla namar ba kane ka ain kam ym iarap ei ei ban khang lad ia ka jingwan ki briew sha kane ka jylla hynrei ka wanrah da ka ain bym lerkam ei ei.
Ka ILP ka dei kaba khlain ban tehlakam ia ka jingwan ki briew sha kane ka jylla bad dei ban bsuh ia ka RLTV Bill jong ka sorkar khnang ban pynkhlain shuh shuh ia ka ain ILP.
U la kyntait ba ki sengbhalang ki don kano kano ka jingthmu ban pynkhyllem shuki ia ka sorkar ne ia u Mukul Sangma kum u Myntri Rangbah kumba la kynnoh hynrei ki dawa ban pyntreikam ia ka ILP.