Ka Theology Seminary, Mawklot kam dei ka jaka pule tang ia ki Khristan

Shillong, 29 Nailur:
Lehse bun ki paidbah ki pyrkhat ba ka Dr John Robert Theological Seminary ka dei kawei kaba ai jinghikai shaphang tang kito kiba don ne ngeit ha ka niam Khristan hynrei kane kam dei kumta. Ha kane ka jaka pule niam kaba la seng da u Dr John Robert, ka pdiang ia kino kino ki briew ki bym dei na ka jait niam Khristan kiba kwah ban wan pule ha ka.
Ia kane ka jaka hikai la seng da u Dr John Robert ha u snem 1891 ha Sohra hynrei kham hadien la pynkynriah noh sha Mawklot kaba don mynta.
U Rupang uba la ioh ban iakren bad u Pastor RT Rymbai uba dei peit ia kane ka jaka pule, u la ioh ban iakren kham bniah halor kane ka jaka pule ki riew niam.
Katkum ka jingiakren bad u Pastor Rymbai, kane ka jaka hikai shaphang ka jingngeit niam, ka pdiang sngewbha ia baroh kiba kwah ban wan pule tangba kan shong katkum ka jinglait jaka.
U la ong ba ha ka shisnem, ka bor pyniaid jong kane ka jaka pule ka pdiang kumba 150 ngut ki samla ban wan pule. Ka jingpdiang kan long naduh kito kiba pyndep ia ka klas XII bad kiba la dep ia ka graduate.
Hangne ha skul niam la ai jinghikai lut shaphang baroh ki jingngeit niam watla kaba kham kongsan la hikai ia ka niam Khristan. La hikai ha ka sobjek kum ha kaba iadei ban ka niam Hinduism, Sikhism, Jainism, Islam kynthup ia ka niam Khasi bad kiwei kiwei pat nalor kine lait noh tang ia science.
U la ong ruh ba mynta hangtei ki thmu ban pynrung ia ki jinghikai ba iadei bad ka jaidbynriew khnang ban kyntiew ha ka imlang sahlang.
Ha kane ka jaka pule ym tang ba ki shynrang kiba lah ban leit pule hynrei ki kynthei ki lah ban wan pule hynrei na ka liang ka Balang Presbyterian kam pat don ka kyndon kaban ailad ia ki kynthei ban shimti kum ka pastor.
Mynta u snem ki kynthei ki don 28 ngut ki ba wan pule ha katei ka jaka shaphang ka ktien jong u Blei.
Bun na ki niam bapher bapher ki wan ban pule ha kane ka jaka naduh ka Balang Katholik bad kiwei kiwe ruh.
Kito kiba dei na ka Balang Presbyterian ynda ki la dep ia ka jingpule na kane ka jaka, lada ki kwah ban long Pastor ki lah hynrei ki hap ban leh ia ka jingpyrshang ne probationary lai snem bad hadien ba la ibit ka Balang ki lah ban ioh kyrdan Pastor.
Hynrei kito ki bym kwah, ki bun kiba shu seng ne trei ia ki kam shakri Ia ia ka imlang sahlang sha kylleng ki jaka kum kaba seng skul, bad kiwei ki kam shakri paidbah.