Pynkylla ia ka rukom hikai ha skul, ong u nongbishar

Shillong,27 Nailur:
U nongbishar ka High Court, U Justice SR Sen u la ong ba ka rukom hikai ha ka jylla dei ban pynkylla noh na kaba ju long mynta.”Ka rukom hikai ha ka jylla ka dei ban long kaba kham kyrpang bad kaba don ka lad ban ioh kam. Ngam tharai ba ki khynnah skul kin ioh jingmyntoi da kaba shu bsa tang ia kaei kaei kaba na ki kot pule” ong u Justice Sen haba aijingkren ha ka sngi rakhe kaba 49th foundation day ka Shillong Law College, mynhynin ka sngi. U Sen u la ong ba tang ki lecture bad ki note kam pat biang ia ki khynnah bad kan ym iarap ia ki ban poi sha ka thong hakaba la ju iohi ba ki ju khynnuih bad artatien haba ki sdang ban leh ia kiei kiei bad kane ka dei namarka jingduna palat ka jinghikai ba kin leh ym tang ba kin tip ( practical). U la ong ruh ba ka long kaba donkam haduhkatta katta ban buh noh da ka National Law School, haka jylla hakaba ki khynnah ka jylla kinlah ban iakhun bad tynjuh bor bad kiwei pat ki khynnah ki jylla bapher bapher. “Nga sngewkmen ban tip ba u Myntri Rangbah u Dr.Mukuul Sangma u don jinthmu ban seng ia ka National Law School ha ka jylla” ong u Sen.
U Senior Advocate, GS Massar uba long ruh u President jong ka Governing body u la ong ba ki nonghikai bad ki khynnah skul ki dei ban don jingiadei khnang ban lah ban poi sha ka jingnang jingstad kaba paka. U la pynpaw ruh ba u la kyrmen skhem ba ka sorkar kan leh eiei ban iarap ban pynkiew kyrdan noh ia katei ka jaka pule ki khynnah pule ain.