Mynjur ka sorkar, ia ka phiah Constituency MDC KHADC, yn soi sa u lat

tang u rupang
Shillong, 24 Nailur:
Katkum ka khubor ba la ioh lum mynta ka sngi, la ioh jingtip ba ha kane ka ilekshon MDC, 2014 sha ka Khasi Hill Autonomous District Council (KHADC), lah ban pyntreikam da ki constituency kiba la phiah thymmai (delimitation).
Shuh shuh Katkum ka khubor ba la ioh da u Rupang la iathuh ba, hadien ba ki MDC jong ka KHADC ki la leit ban iakynduh ia u Myntri Rang bah Dr. Mukul Sangma dangshen kiba la ban jur ban pyntreikam beit da ki constituency kiba la phiah thymmai, na ka liang jong ka sorkar ka la mynjur ia kane ka bill phiah constituency bad la phah ruh sha u Lat na ka bynta ban ioh ia ka jingmynjur.
Haba iakren bad u Chief Executive Member (CEM) jong ka Khasi Hill Autonomous District Council (KHADC), bah Pynshngain N Syiem u la iathuh ba na ka liang jong ka sorkar ka la dep mynjur ia kane ka bill bad la phah ruh sha u lat ka jylla na ka bynta ban ioh ia ka jingmynjur, hynrei um shym pat kren thikna satia la kane ka bill kan treikam ne em ha kane ka ilekshon MDC ba nwan.
Lah ban pynkynmaw hangne, ba kham mynshuwa ruh na ka liang jong ka sorkar hadien ba ka la ioh pdiang ia kane ka bill phiah constituency na ka KHADC, ka la ai ia ka jingmynjur bad la phah ruh sha u lat na ka bynta ban ioh ia ka jingmynjur, hynrei na ka liang jong u Lat um shym pat ai satia ia ka jingmynjur, hynrei u la phah biang sha ka sorkar ha kaba la ai jingmut ruh ba kan bishar bniah biang shuwa bad ban pynbit pynbiang ha ka rukom kaba iabiang lang namar ha kato ka por ka la mih ruh ka jingpyrshah na kiba bun ki liang.