Ki seng sainpyrthei kiba kynthup ia ka HSPDP, KHNAM, NPP bad UDP hadien ba la wai ka jingialang jong ki kaba la long mynta ka sngi ha Shillong Club, ki la rai ba kin pynlong da ki prokram ia khih bad ki jingia iaid paidbah ha kine ki khyndiat sngi ki ban wan hadien ka jingiakynduh biang jong ki sa shisien hapoh ki ar lai sngi. Ha katei ka jingialang ba la khot ka KHNAM ym pat shym la thaw kyrteng ia katei ka kynhun jong ki seng sain pyrthei kiba ia khih ILP, hynrei la shu tip ia ka kum ka Joint Forum bad ha ka jingiakynduh jong ki sa shisien hapoh kine ki ar lai sngi yn thaw syndon da ka kyrteng jong katei ka kynhun ia khih. “Ngin sa ia kynduh biang hapoh kine ki ar lai sngi ha kaba ngin thaw ia ka kyrteng ka kynhun iakhih jong ngi , bad ngin sa pynbna ia ki jingiakhih ban pynbor ia ka sorkar ban pyntreikam ia ka ILP” ong u Bah Pyndap Saibon President ka KHNAM uba long ha ka juh ka por kum u Convener katei ka jingialang.
Nalor ki prokram ia khih kiba katei ka kynhun sengsain pyrthei ki la shim ia ka rai jong ki ha katei ka jingialang , ki la kyntu ruh ia ka sorkar ba kam dei ban thwet ia ki nongialam Sengbhalang kumba ka la don ka jingthwet ban ioh kem ia ki ha kine ki sngi.
Haba kren pynshai ia ka jingdawa ILP ki seng sainpyrthei , u Bah Pyndap u la ong ba ka jingdawa ILP kam dei ka jingpyrshah iano iano hynrei ka dei ban iada ban jaitbynriew lajong. “Ban dawa ILP kam mut ban pyrshah iano iano hynrei ka dei tang ban iada ia ka jaitbynriew lajong” bynrap biang u Bah Pyndap.
U Bah Adelbert Nongrum haba kren sha ki nongthohkhubor u la ong ba ia ka ILP ym donkam ban ap ia ka rai bad ka jingmynjur jong ka sorkar pdeng , namar ka ILP ka dei kaba la don lypa hynrei kaba sah ka dei tang ban pyntreikam ia ka. “Ngim donkam ban ap iaka jingmynjur ka sorkar pdeng , ka ILP ka la don lypa , kaba sah ka dei tang ban pyntreikam ia ka” ong u Bah Adilbert MDC ka Jaiaw.
Katkum ki jingkynthoh ka UDP ia ka ILP kaba la don lypa ban pynwan dur thymmai na ka bynta ki bar jylla kiba la shongduh ha kane ka jylla, ( Modified ILP) u Bah Pyndap u la ong ba donkam ban ia phylliew jingmut halor katei ka phang bad u la ong ba lada ka don ka jingiadei ba ka jaitbynriew kan iohia ka jingiada kaba skhem lah ban pdiang ia ka hynrei u Bah Pyndap u la kdew ba ka ILP ba la don lypa ka dei kaba la biang bha. Lah ban kdew ba ha katei ka jingialang kaba ka KHNAM kaba bym shym la don uwei u nongmihkhmat ruh haka Ing Dorbar ka la pyniaid ym shym la don uwei ruh u MLA ba la wan ban ia shim bynta na kino kino ki seng.
Phi don ban ong eiei?