Ba die mawit ha Umshyrpi, ujor ka UDP

Shillong, 24 Nailur:
U President ka UDP Mylliem Constituency u Bah Hamlet Dohling u la phah da ka jingthoh sha u Chief Engineer ka tnad PWD halor ka jingpyndonkam bakla jong ki katto katne ki briew kiba pynlong ia ka jaka kaba don ha jingkieng Umshyrpi kum ka kal kamai jong ki da kaba die mawit bad shyiap ha katei ka jaka, U Bah Hamlet haka jingthoh jong u u la ong ba ka tnad ka dei ban pynsangeh shisyndon ia katei ka jingpyndonkam bakla ia katei ka jaka.
U Bah Hamlet u la dawa ruh ba ka tnad ka dei ban shim iaki lad ki lynti bad ban phah sha ka sorkar ba kan mynjur ba ka jingkieng Umshyrpi kaba la sah nam naduh kip or ba la tei da ki phareng kan long kum ka jaka sahnam ne ki jingtei sahnam ha katei ka jaka. Ka UDP ka la kyntu ruh ia katei ka tnad ba kan pynkhuid ia katei ka jaka khnang ba kan ym don kino kino ki kam jakhlia ne ki jingma ia ki paidbah kiba iaid lynti lyngba katei ka jingkieng.