Pyllait ia kiba shah kem:NPP

Shillong, 19 Nailur:
Ka National People Party (NPP) ka la dawa ba dei ban pynlait noh ia baroh ki samla pule kiba shah kem halor ka jingkyn noh ba ki donkti ban ktah kti ia ki nongtrei sorkar ha DC ophis ha Tura ha ka por ba ki iakhih ban dawa ia ka jylla Garo. U nongaiktien ka NPP u James Sangma u la ong baroh ki khynnah pule dei ban pynlait noh mardor khnang ban wanrah ia ka jinglong jai jai biang ha Garo Hills.
Ka NPP ka la pynpaw ia ka jingsngew khia ia ka jingktah jong ka pakhang shnong ha Garo Hills. “Ka party ka sngew ba kane ka jinglong jingman ka la lait na kti jong ka sorkar ka bym lah ban tehlakam namar ka jingbym ler jongka ban shim ia ki lad jingiada” la ong u James.
U la ong ba ka party kam lah ban shu sngap ia ka jingshah kem jong ki samla pule bad sngew ba ka jingkem pathar ia ki samla pule ka long kumba ki dei pynban ki runar ba shyrkhei da kaba pynngat ia ki kyndon ba eh.