Yn nym pyntreikam ILP bad yn nym khot iakren:Mukul Da ka hukum ka Iingbishar, yn khyrwit ia ki sengbhalang

Shillong, 18 Nailur:
Ka jingialang jong ka sorkar MUA hapoh ka jingialam jong u Dr. Mukul Sangma ka la kren shai ban nym pyntreikam ia ka Inner Line Permit (ILP) kumba la dawa da ki sengbhalang kiba la shim ruh da ki lynti jingiakhih.
“Ngi la iatai sani bha bad ngi la bishar bniah ruh ia ka jingai jingmut jong ka High Level Committee (HLC) ba la khlieh da u bah Bino M Lanong myntri sorkar barim bad yn nym lah ban pyntreikam ia ka ILP” la ong u Dr. Mukul Sangma haba kren ha ki nongthoh khubor hadien ba la wai ka jingialang jong ka MUA mynta ka miet ha iingsah jongu kaba la wan iashim bynta da ki 38 ngut ki MLA.
“Katba ki dang pynlong ia ki jingiakhih, ngin nym khot iakren satia bad halor ka jingpynlong ia ki pakhang shnong bad kiwei ki jingiakhih, ngin hap ban iaid katkum ka hukum jong ka Supreme Court bad ka High Court kaba la mana ban pynlong ia kiba kum kine ki jingiakhih” la ong shuh shuh u Dr. Mukul Sangma haba jubab ia ka jingkylli jong ki nongthoh khubor kiba la kylli la ka sorkar kan khot iakren ne em ia ki sengbhalang ban pynkut noh ia ki jingiakhih kiba dang iaid shakhmat haduh mynta.
Shuh shuh u Dr. Mukul Sangma u la ong, ka jingthmu jong ka ILP hi ka long ban iada ia ka jingwan rung kyrthep jong ki mynder ha ka jylla, kumta ka sorkar ka la shim da kiwei pat ki lad ki lynti ha ka jaka ka ILP. U la ong ba ka sorkar ka don ia ka Land Transfer Act na ka bynta ban iada halor ka jingthied jaka jong ki bar jylla bad ka sorkar ka la pynkhreh ruh ban pyntreikam ia ka ain Tenancy Act ka ban peit bniah iano ban ai jaka sah bad iano yn nym shah.
U la iathuh ba ka jingpynkhreh ia kane ka ain ka la iaid shakhmat bad shen yn sa wanrah ha ka kynhun myntri cabinet ban iatai sani bad hadien kane yn sa leit sha ki paidbah ban pan jingmut shuh shuh khnang ba kane ka ain kan long kaba khlain.
Shuh shuh u la iathuh ba na ka bynta ban teh lakam ia ka jingwan rung kyrthep ki mynder ka sorkar ka la thung ia u director jong ka tnad infiltration bad ka jingthmu ban thung ia kumba 117 ngut ki nongtrei jong kane ka tnad ka dang iaid shaphrang.