Ing ka ophis NYK ha Nongstoin, shuwa ban kut pakhang surok

Nongstoin, 15 Nailur:
Ha ka step ka sngi Saitjain por 4.30 AM ki riew runar ki la thang ia ka ophis jong ka tnad Nehru Yuva Kendra (NYK) kaba don ha Nongstoin kaba jngai kumba 100 meter eiei naka iing sah jong u Deputy Commissioner ka West Khasi Hills.
Kane kala jia ha ki kynta pakhang surok bad ka dei ruh sa tang shiteng kynta shuwa ban kut ka pakhang surok jong ki 10 seng bhalang ban dawa pyntreikam iaka ILP.
Ia katei ka jingjia la lap da ki katto katne ki samla kiba dang mareh step ha kaba mar syn iohi iaka ding kaba la rhem bha shapoh kila pyntip mar mar sha ki Pulit ban tem ia katei ka ding.
Ha katei ka jing shah thang ia katei ka ophis ka jing julor kam shym pat da bun hynrei katto katne ki file kiba donkam bha, ki shuki bad ki tiar ki tar kiba don hapoh katei ka Ophis kila ing lut.
Kane ka jingshah thang kane ka ophis NYK ka dei ka sien kaba ar ha kaba dang myn shem snem katei ka Ophis kala shah thang, na ka liang jong u, ula leit ban ujor mynta ka step da ka ehajar hapoh thanad Nongstoin halor katei ka jingjia.
Ha kawei pat ka jingjia, la iathuh ba ar ngut ki rangbah ki la shah kem na Mawlai Nongmali hadien ba ki pulit ki la ioh ban kurup ia u klong sharak na ki. Kitei kiba la shah kem ki dei kiba la tip kyrteng kum u Arnes Kharbani 41 snem karta bad u Ryius ryntathiang 24 snem karta.
Ki pulit ki la kem ia kitei ki ar ngut ha ka miet sngi thohdieng, najan FCI. Nangta la iathuh shuh shuh, ba 4 ngut ki samla ki la shah kem namar ka jingdonkti jong ki ban shoh ia u nongniah trok ba na UP u Gulfam Khan 38 snem, Baram Pal 42 snem uba dei na Athiani UP bad u khun jong u, u Kapil Kumar uba niah ia ka trok kaba don ia u nombar UP 15-AT. Ia u nongniah katei ka trok la pynkit noh mar-mar sha Civil hospital Shillong na ka bynta ka jingsumar hadien ba u la mynsaw na katei ka jingshah shoh.
Ha katei ka jingjia ki pulit ki la ioh ban kem ia 4 ngut ki samla kiba la tip kyrteng kum u Jonathan Marbaniang, 27 snem uba dei na Nongrim Road, Lumborlang Warjri 27 snem uba sah ha Lumsohphoh, u Jeryland Lyngdoh 27 snem uba sah ha Riatsamthiah bad u Jerymy Shylla 22 snem uba sah ha Malki.
Katei ka jingjia ka la jia ha ka miet sngi saitjain ha ka por 10:30 baje, ong ka khubor na ki pulit.