U Modi, u kyrtong MRD ka BJP

New Delhi,13Nailur:
U Myntri Rangbah jong ka jylla Gujarat u Narendra Modi, u ba long ruh u nongiada ne nongkyr shan ba radbah jong ka Hinduvta, mynta ka sngi u la shah jied bad shah thung noh kum u kyrtong jong ka seng BJP na ka bynta ka shuki Myntri Rangbah duh na ka bynta ka jingialeh elekshon jong u snem 2014 sha ka Lok Sabha, bad kane ka la pynkut noh ia ki bnai jong ki jingsuba ne antad jong ki briew halor ka jingkiew khet jong u wat hapdeng ki jingpyrshah ki bajur na ka liang jong u riewshemphang jong ka party u L K Advani.
Ia kane ka jingpynban la leh da u khlieh duh jong ka BJP u president Rajnath Singh hadien ka jingialang jong ka parliamentary board ka seng ha ka ba la pep noh da u Advani u ba la pynpaw ia ka jingkhie bitar jong u halor ka rukom leh bad rukom treikam jong ka party.
Lait noh u Advani, ka jingialang jong ki 12 ngut ki dkhot jong ka board la wan mih da ki wei pat ki nongialam kum ka Sushma Swaraj, u Murli Manohar Joshi, Arun Jaitley bad u Nitin Gadkari.
Ka rai halor jong u Modi la wan shisngi hadien ba la mih ki jingiamir jingmut bad ki nongialam ba radbah jong ka party bad ruh hadien ki jingpyrshang ba khatduh eh jong ka seng, ban wanrah ia u Advani, u Joshi bad kumjuh ruh ia ka Swaraj.
Ngin sa ialam ia ka BJP sha ka jingjop ha u snem 2014: Modi
Ha ki khyllipmat hadien ba u la shah thung kum u kyrtong Myntri Rangbah Duh jong ka seng BJP, MR ka jylla Gujarat u Narendra Modi mynta ka sngi u la tyrwa ban ialam ia ka party sha ka jingjop ha ki jingialeh ia ka elections jong ka Lok Sabha ha une u snem ban wan.
“Nga kular ba ha u snem 2014 jong ka jingialeh election, ka BJP kan sa wan mih da ka jingjop,” la pynpaw u Modi ia ka jingthikna jong u ha ba iathuh ha ki lad pathai khubor media ha kawei ka headquarters jong ka seng , ha ka ba la wan synran lang ruh da ki nongialam rangbah jong ka party lait noh tang u LK Advani.
“Bad na ka bynta ka ne, ka party kan sa trei shitom bha bad kan nym ieh wat ia uwei u maw ruh ban nym pynkylla,” la ong u Modi ha ka jingkren lyngkot jong u hadien ba la shah thung kum u kyrtong prime minister jong ka Bharatiya Janata Party. U la ong ba ka ri ka la iaid lyngba shibun ki jingeh bad kumjuh ruh ka party.
“Nga thikna ba ki briew na ka thain Kashmir haduh Kanyakumari kin sa thep ia ka vote jong ki ha u syntiew lotus u ba long ka dak jong ka BJP,” la ong u Modi.
Sngewdiaw u Advani
U Advani u la ai jingthoh sha u heh duh jong ka BJP halor ka jingthung ia u Modi. U la pynpaw ia ka jingujor jong u pyrshah ia ki stai ne rukom leh jong u Rajnath.