Shillong,12 Nailur:
Ha Garo Hills ka pakhang shnong ba khlem sangeh ki sengbhalang ka la sdang mynta ka sngi, katei ka pakhang shnong ka dei kaba la khot da ka Garo Hills State Movement committee (GHSMC) ban dawa jylla Garo Land. Ha ka jingsdang jong ka pakhang shnong ha baroh kawei ka Ri-Lum Garo, wat la ym shym la don kano kano ka jingjia kaba sngewsih, hynrei ka la don pat ki jingjia ia kawang maw hajan Tura Government College.
Halor katei ka pakhang shnong kaba khlem buh por ki sengbhalang u Dr.Mukul Sangma u la ong ba wat la ki don ki jingdawa da ki jingiakhih ruh ,hynrei ka Khasi bad Garo kin ym ia pait ia pra dalei lei ruh. “Ngam lah ban iohi lypa kan long kumno katei ka jingdawa, hynrei ka Khasi bad Garo kin ym ia pra dalei lei ruh” ong u Dr.Mukul Sangma Myntri Rangbah ka jylla uba la ong ba kane ka jingdawa ka dei naduh ki por mynshuwa bad kim dei shuh kiba thymmai”.
Shuh shuh u Dr.Sangma u la ong ba ka rai jong ki paidbah bad ki sengbhalang ban pynlong da ki jingiakhih haba ki dawa ia kano kano ka jingdawa jong ki kam dei ka lynti kaba bha bad kaba lah ban pynhun ia ki, “Ka jingiakhih kam dei ka lynti kaba bha ba kin shim” bynrap biang u Sangma.
Lah ban kynmaw ba 13 ngut ki dkhot jong ki sengbhalang, kiba la iakhih hapoh ka lama jong ka GHSMC ki la shah kem mynhynnin ka sngi namar ka jingktah kti bad ka jingthombor ia kawei ka nongtrei sorkar.
Hadien ka jingshah kem jong ki 13 ngut kumba 60 ngut ki briew ki la tur sha ohis jong u Deputy Commissioner ka West Garo hills bad ki la dawa ba dei ban pyllait mardor ia kiba shah kem hapoh ka shi kynta lym kumta kin pynlong ka jingiakhih kaba khlem sangeh, iathuh u DC ka West Garo Hills u Pravin Bakshi.
Phi don ban ong eiei?