Shillong, 12 Nailur:
U Symbud Myntri Rangbah ba peit ia ka pule puthi ha ka jylla u Dr. RC Laloo u la ong ba ka jingkhang ka ophis jong u ka plie rynghang ha kano kano ka por ba ki nonghikai ki kwah ban iakren.
“Ki nonghikai kiba iakhih ki long kiba laitluid ban wan iakynduh ia nga ha kano kano ka por ba nga don lait noh lada nga leit jingleit shabar. Kim donkam ban buh sngi, tang kawei ka long ba ki dei ban pynthikna na u personal secretary la nga don ne em ha ophis,” la ong u Dr. Laloo ha kane ka sngi Palei.
Haba pyntip ba un don jingialang bad ki dkhot jong ka All Meghalaya Primary School Teachers’ Association (AMPSTA) ha ka 30 tarik Nailur, u Dr Laloo u la ong ba u long uba khreh ban iakynduh ia ki dkhot ka Joint Action Committee of All Teachers’ Association of Meghalaya (JACATAM) ban iakren ia ki jingeh jongki.
“Nga sngew lyngngoh ba la kynnoh ia nga ba ngam kwah ban iakynduh ia ki briew. Ym don ei ei kaba kum kata, lait noh tang ka pyrda ha ka jingkhang jong ka ophis jong nga. Namarkata, ym don ei ei ban sheptieng bad mano mano long laitluid ban iakynduh” la ong u Dr Laloo. U la ong ba ki nonghikai kiba iakhih ki don saw tylli ki jingdawa kynthup ka Education Policy, ban pynlait ia ka tulop man u bnai, ki kam ba iadei bad ka Meghalaya Board of School Education (MBoSE) bad ka jingshimti ka sorkar ia ki kam hikai ne provincialisation.
Halor ka jingkylli shaphang ka jingdawa ban shimti ka sorkar ia ki kam hikai, u Dr Laloo u la ong ba donkam ban pyrkhat bha shwa halor kane.
“Ka tand Planning, Finance, Personnel bad kiwei ki tnad kin hap ban eksamin ia kane ka kam na baroh ki liang. Kam long kaba suk ia ka sorkar ban shu shim ia ka rai” u la ong.
U la ong ba katkum ka jingsngewthuh jongu, ka jingshimti ia ki kam nonghikai ym lah ban leh khlem shimti lut ia ki skul ruh.Haba shimti ia ki kam hikai hap shimti ruh ia ki skul baroh.
“Kane kam ju jia, ka sorkar ka dang eksamin ia ki jingdawa jongki. Hynrei nga sngew ba ki nonghikai ki donkam ruh ban pyrkhat ia kaba lah ban leh” la ong u Dr Laloo.
Phi don ban ong eiei?