Shillong, 12 Nailur:
Hadien ba la iaid ka jingiakhih kumba 7 sngi, ka Khasi Students’ Union (KSU) ka la ong ia ka sorkar jylla ba ka dei ban khot iakren noh ia ki nonghikai namar ba ka jingiakhih ka la ktah jur ia ki khynnah skul ha kane ka jylla.
Ki skul ha kylleng ka jylla ki la shah ktah jur namar ka jingiakhih jong ki nonghikai da kaba pep leit hikai klas naduh ka 11 tarik bad kan kut lashai ka 13 tarik Nailur. Ki nonghikai hapoh ka lama ka Joint Action Committee of All Teachers’ Associations of Meghalaya (JACATAM) ki la sdang ia ka jingiakhih naduh ka 27 tarik Nailar ba la dep.
U Education secretary ka KSU u Bah Donald V Thabah u la kyntu ia ka sorkar ba ka dei ban khot iakren noh ia ki nonghikai ban pynbeit ia ki jingeh khnang ba ki khhynnah skul bad ki pule puthi kan ym thut. U la ong ba namar ka jingbym treh ka sorkar ban khot iakren ia ki nonghikai, ka la pynlong ia ki ban mih sha madan bad kane ka la ktah kylla ia ki khynnah skul.
Katkum ka jingong u Bah Donald, ka jingleh ka sorkar ka pyni ba kam don ka jingkitkhlieh ia ka pateng ban dang wan. U la ong ba ka jingkyntait ia ka jingpyntreikam ia ka Inner Line Permit (ILP) ka dei kawei kaba ka sorkar kam don ka jingkitkhlieh.
U la ong ruh ba lada ka sorkar ka kwah ia ka roi ka par kan wan ha ka jylla, ka dei ban sngap ia ki jingdawa jong ki nonghikai bad na ka liang ka seng, kyrshan ia ki nonghikai hapoh ka lama ka JACATAM kiba iakhih haduh mynta.
Namar kane ka jingiakhih jong ki nonghikai, ki skul bym dei sorkar kynthup naduh ki lower primary haduh ki higher secondary, ki la ktah jur. Kumba 4047 tylli ki skul ha ad-hoc bad deficit ha ka jylla ki la shah ktah na ka jingbym leit hikai ki nonghikai. Kane ka jingiakhih ka long ban pynsngew ia ka sorkar kaba kuman haduh kine ki sngi hapoh u Symbud Myntri Rangbah ba peit ia ka pule puthi u RC Laloo bad u Myntri Rangbah u Mukul Sangma.
Phi don ban ong eiei?