Shillong, 11 Nailur:
Wat la ka don ka jingiakynad kaba napoh napoh bad ka jingbym hun shuh jong kiba bun ki MLA hapoh ka jingialam jong u Dr. Mukul Sangma, hynrei ym don satia ba nud ban kren ne pynpaw pyrshah halor kane.
Katkum ki tyllong khubor ba la ioh lum la iathuh ba ki don bun ki MLA ki bym hun ia ka rukom treikam bad ka rukom pyniaid jong u Dr. Mukul Sangma ia ka synshar khadar ha ka jylla bad kane ka long na ki MLA Congress bad kumjuh ruh ki MLA shimet.
La iathuh ba ka jingbym hun ia ka rukom treikam jong u Dr. Mukul Sangma ka dei namar ka jingtuklar jongu jan baroh ki tnad sorkar wat la ka la don ki Minister. Shuh shuh ki khubor ki iathuh ba kane ka jingiakynad ka la shu kyan hapoh hapoh bad mynta ka la nang kham jur shuh shuh hadien ki jingiakhih jong ki sengbhalang kiba la dawa ban pyntreikam ia ka Inner Line Permit (ILP) ha ka jylla.
Haba la pyrshang ban wad jingtip halor kane la ka don ne em ka jingiakren pyrshah lane ka jingthmu ban pynkhyllem noh ia u Dr. Mukul Sangma kum u myntri Rangbah khamtam na ki MLA Congress, la iathuh ba kiba bun ki MLA Congress wat la ki don ka jingsngewpyrshah ia u Myntri Rangbah Dr. Mukul Sangma, hynrei haduh mynta kim pat nud ban kren pyrshah ne pynpaw pyrshah, hynrei ka la shu kut noh tang ha ka jingkyan kaba hapoh hapoh.
Lah ban kdew hangne ba na ka liang jong u Myntri Rangbah barim uba dei ruh u nongialam ba rangbah jong ka Congress u Salseng Marak u la pynpaw lyngba ki tnad pathai khubor kham mynshuwa ba u kloi ban shimti ia ka shuki Myntri Rangbah lada ki bor ba halor jong ka Congress (AICC) ki ibit ban bynshet ha u ia kane ka kam.
Lah ruh ban kdew hangne ba u Salseng C Marak u dei u Myntri Rangbah uba ka jingshar ka neh 5 snem kynthih, hynrei kiwei pat ki Myntri Rangbah kin iohlad ban pynkut ia ka jingsynshar 5 snem kynthih bad ka ka sorkar ka khyllem noh tang da ki 2 bad 3 snem.
Kumba ka long mynta ka Congress ka don ia ki nongialam kiba shakhamt kiba kynthup ia u Dr. DD Lapang, SC Marak, Bah Prestone Tynsong bad kiwei kiba lah ban shimti ia kane ka shuki lada kiba bun ki MLA kim shanniah shuh ia u Dr. Mukul Sangma ba un ialam ia ka sorkar.
Phi don ban ong eiei?