Lah ban nym ap eksamin Selection Matrik ki nonghikai

Shillong, 11 Nailur:
Namar ka jingiai kuman ka sorkar ban khlem khot iakren ia ki nonghikai hapdeng ba ki la pynlong ia ka jingiakhih haduh kine ki sngi, ka la don ka jingsngew ba kum ka jingpynjur shuh shuh ia ka jingiakhih, ki nonghikai ki lah ban boycott ne ban ym iashim bynta ban leit ap ia ka selection test jong ki klas X mynta u snem.
Ka eksamin selection test jong ka klas X kan sdang naduh ka 16 tarik mynta u Nailur haduh 25 tarik.
Lada ki nonghikai kin pep ban ap ia ka eksamin selection test, kan long ka jingeh ia ka Meghalaya Board of School Education (MBOSE) kaban pyniaid ia kane ka eksamin.
Kumba ju long, ka sorkar ka shaniah tylli ha ki nonghikai skul ban ap bad ban korek ia ki jubab jong ki khynnah skul kiba iakhun ia kane ka selection test da ki phew hajar man ka snem.
Lada kan jia shaduh une u pud, kan long ka jingeh ia ka MBOSE bad ha kano ka rukom kan iakhun pyrshah ia kane ka jingeh.
Ki nonghikai kiba la don lypa ha ka lynti ka jingiakhih, haduh mynta, ki la sngewsih jur ia ka jingleh kuman ka sorkar jylla ban khlem khot iakren satia wat haduh ba la iakhih la bun sngi.
Ka KHNAM ka dei kawei ka seng sain pyrthei kaba la kyrshan ia kane ka jingiakhih jong ki nonghikai bad ka la pynrem jur ia ka sorkar khamtam ia u Symbud Myntri Rangbah ba peit ia ka pule puthi Dr RC Laloo bad u Myntri Rangbah ka jylla u Mukul Sangma.
Lah ban kdew ba ki nonghikai naduh ki lowe primary skul haduh ki higher secondary ki la mih sha madan ban pynbor ia ka sorkar ba ka dei ban khot iakren ia ki ban pynsngew ia ki jingeh ba ki iakynduh bad ruh ha kaba iadei bad ka jinglong jingman ka pule puthi ha kane ka jylla.