Tang na ka jri siat sim, shah kem ki samla Nongmensong

Shillong, 11 Nailur:
Mynta ka sngi, ki nongialam jong ka seng kynthei Nongmensong, hapoh ka jingialam jong I Kong A Nongrum, President jong katei ka seng Nongmen song Women Welfare Association (NWWA), ki leit iakynduh ia ka myntri kam poh iing ka sorkar jylla, kong Roshan Warjri.
Ha katei ka jingleit, ki nongialam jong ka seng longkmie, ki kren sngewkhia jur, halor ka jingkem briew jong ki pulit ka Nongmensong, ha ki khyndiat sngi ba ladep, ha kaba la iathuh ba ia 3ngut ki samla, la shu leit sei beit na iing, ha ka por 1.30 bad 2baje mynstep. Ym tang katta, la iathuh ba ia kitei ki samla, la leit kem ruh, da ki pulit, kiba phong jain paidbah bad katei ka dei kaba ka seng longkmie Nongmensong, kam mynjur satia, namar ba ki la don bun ki khep, ba ki briew, kiba riam paidbah, ki leit kem briew ha katei ka rukom bad ba kim dei satia ki pulit shisha.
Na ka jingiathuh ka kong A Nongrum, President katei ka seng longkmie,la iathuh ba ia kitei kiba la leit kem, la kynnoh, ba dei ki riew pyntriem, tang na ka daw, ba la ioh ia ka jri siat sim, na ka iing jongki bad ka kong Nongrum, ka ong “Ngi ruh ngi don ia ka jri siat sim ha iing”.
Ka seng longkmie, ka iathuh shuh ba ia arngut kiwei pat kiba la shah kem, la shu patan ia ki, na lynti shnong bad haduh mynta, kiba shah kem na Nongmensong, ki long 5ngut baroh.
Ka Kong Nongrum, ka ong ba ha ka jingpeit hi jong ki, kum ki longkmie, kam I dei ia kitei ki lai ngut, kiba shah kem, ba kin dei ki samla, kiba leh ia ki kam beain, naba ki dei kiba kit kam bha ha shnong ha thaw bad kiba im don burom. Ka kong Nongrum, ka ong “Shu phareng, tangba tip kyrteng”.
Ka myntri, la iathuh ba ka sngewtynnad ba la leit iathuh ia katei ka jingshisha, kaba la leh da ki pulit, ha kaba iadei bad ki samla Nongmensong, ong ka kong Nongrum.