Kyntait ka AMALPSA, ia ka rai jong ka AMPSTA

Shillong, 10 Nailur:
Shi sngi hadien ba ka All Meghalaya Primary School Teachers Association (AMPSTA) ka la kyntait ban ym iahim bynta ha ka jingiakhih jong ka JACATAM, na ka liang ka All Meghalaya Adhoc Lower Primary School Association (AMALPSA) ka la kyntait jur bad ka la ong ba baroh ki nonghikai skul Lower Primary ki dei ban bat ia ka rai jong ka rally ba la long ha madan Malki ha ka 5 tarik Nailur.
Haba pynlait khubor hynne ka janmiet, u Secretary ka AMALPSA u Bah RS Khardewsaw u la ong ba ka seng ka kwah ban pynshai ia ka jingpynmih khubor ka AMPSTA, kaba pynsngewthuh bakla ia ki nonghikai Lower primary ha kane ka jylla.
“Na ka liang ka All Adhoc LP Primary School Association (AMALPSA) ka bat beit ia ka rai kumba la mynjur lang bad la shut la shor ia ka kyrteng ka JACATAM naduh ka 20 taik Iaiong 2013, ngin iai neh hauh ba kut”, la ong u Bah Khardewsaw.
U la ong ba ki nonghikai LP Ahoc ki kyrshan bad ki don beit bad ka JACATAM namar ba dei tang kane ba la shaniah bad kyrmen skhem ba kan lah ban weng ia ki jingeh jong ki nonghkai.
“Ngi shaniah tylli tyllan ha ka JACATAM namar ba ngi iohi ba ki mat jingdawa ki long kaba biang”, la ong biang u Bah Khardewsaw bad bynrap ba baroh ki skul Adhoc LP ha kane ka jylla ba kin sngewbha ban khang kdam lut ia ka skul naduh 11 haduh 13 tarik kumba la iashim rai ia ka rai ha rally ha madan Malki ban pyrshah ia ka jingkuman ka sorkar.
“Kino kino kiba ialeh pyrshah ka seng kan ym kitkhlieh lada jia ei ei hadien habud”, la ong u Bah Khardew.