Mynta yn rai iakhih sa ka HANM

Shillong,10 Nailur:
Ka Hynniewtrep Achick National Movement (HANM) jong ka West Khasi Hills District lashai ka sngi kan shim ia ka rai iakhih jong ka ha ka jingialang ki dkhot ka executive committee jong ka seng kaba ban long lashai ka sngi. Ka HANM ka la shim ia ka sien jam ban pynbna syndon da ki jingiakhih namar ka jing mutlop ka sorkar ban jubab ia ka jingdawa jong ki ban weng noh ia u Deputy Commissioner ka West Khasi hills district.
“Ngi la phah ia ka shithi dawa jong ngi sha ka sorkar ban weng noh ia une u DC ba mynta” ong u bah Paul President ka HANM West Khasi Hills uba la iathuh ba ka sorkar jylla kam shym la patiaw eiei ia kitei ki jingdawa ka seng bad ka jingleh bym patiaw jong ka ka pynbor ia ka seng ban shim da ki lad jingiakhih ban pynbor ia ka ba kan weng noh shisyndon ia u DC ba mynta.
Shuh shuh utei u President jong ka seng u la iathuh ba ka seng mynta ka sngi ka la pyrshang ban leit ia kynduh ia u Chief Secretary ka jylla u Bah WMS Pariat ban pynsngew ia ka jingdawa jong ki ha khmat jong u hynrei u CS um shym la don ha ophis treikam jong u bad haba ki la wad jingtip shaphang ka shithi dawa jong ki ki la lap ba kam pat iaid kam haei haei ruh.
“Ngin shim da ki lad jingiakhih kiba tyngeh namar ka sorkar kam patiaw eiei ia ki jingdawa jong ngi” bynrap biang u Bah Paul uba la iathuh ruh ba ka seng ka bitar jur ia ka jingbym pynshah shkor u Chief Secretary ka jylla ia ka jingkwah ka seng ban ia kynduh ia u wat hadieen ba ki la pan jingbit ban ia kynduh. Ka seng ka la kynnoh ba katei ka jingleh ka dei ka jingbym kitkhlieh ia ka jingeh ki paidbah nongshong shnong ka West Khasi Hills.