Wat ia ka tulop nga ai sha kiba duk, ong u Manas

Shillong, 9 Nailur:
U MLA barim ka Mawprem u Manas Chau dhury, u la kyntait ia ka jingkynnoh ka Greater Laban Community Development Society (GLCDS) ba u la pyndonkam bakla ia ka MLA skhim naduh u snem 2005-2013 kaba la kot sha ka T. 1. 34 klur.
Haba kren mynta ka sngi, sha ki lad pathai khubor, u Manas u la ong ba ka jingkynnoh ka long kaba bakla bad ka bym shisha hynrei ka sma poltik pynban. “Haba nga wat ia la ka tulop nga la dep ai lut sha kiba duk, ki dang kynnoh”, u la ong u Manas bad bynrap, ba baroh ka tulop jongu kaba la kot sha ka T. 89 lak naduh ba u long MLA um shym la shim ialade, hynrei ula pyndonkam na ka bynta kiba duk bad kiba shem jingeh ha ka constituency jong u.
U la kam ruh ba u la pynphai noh ia ka pisa kaba la kot sha ka T. 14 lak ei ei na ka MLA skhim namar ba ia ki skhim ba la mang ban pyntreikam la mih ka jingeh hadien bad ym lah ban pyntrei kam ia ki.
“Ngam ju pyndonkam bakla ia ka pisa u paidbah wat tang shi tyngka ruh, ne ngan tyrwa pisa iano iano”, la ong u Manas.
U la ong ba u la dep pynlait ia ka kot kaba batai bniah ia ka rukom pyntreikam ia ka MLA bad ha ka jingtip jongu, dei tang u ma u, marwei u MLA uban leh ia kane ban ai jingkhein sha ki paidbah ia ka rukom pyndonkam bad pynlut pisa ia ka MLA skhim kaba dei ka pisa sorkar bad kaba wan na u paidbah.
Katkum ka jingong u Manas, ka jingkynnoh ka dei ka jingleh politik tad dor jongno jongo re bad hynrei um kwah ban jer kyrteng ia kiba kthong ia u watla u la rem ha ka elekshon ruh. “Nga sngew lyngngoh kumno ki kthong ia nga haba nga la rem ruh, ka don ei ei imat”, la pynpaw u Manas.
Lah ban kdew ba u President ka Greater Laban Community Development Society u RK Dutta bad u Secretary Bah A Marwein ki la kynnoh ba u MLA barim ka Mawprem lyngba ka implementation Committee for 21 Mawprem Constituency kala kam ba ia ka pisa la pyllait haduh 50 percent katba ia ki kam pat, ym trei ei ei bad kane ka jingpyndonkam bakla ka la kot sha ka T.1,34,99,085 klur.
Ka Greater Laban Community Development Society (GLCDS) ka la ujor FIR (First Information Report) ha u SP ka East Khasi Hills halor ka jingkynnoh ba pyndonkam bakla ia ka MLA skim jong u snem 2005-2013 u Manas Chauduri.