Shah bom dusmon, 5 ngut ki samla ha U OC Pynursla

Shillong,8 Nailur:
San ngut ki samla na ka shnong Pynursla, ki la mynsaw hadien ba ki la shah bom shah tied ha u Officer Incharge(OC) ka Pynursla Police Station u Ram Prasad Bhusal. Ki 5 ngut ki samla kiba la shah shoh ki dei kiba la tip kyrteng kum u W.Khongstia, Sher mingstar Lyngdoh, Wanpli Khongthaw, H Blessing Nongrum bad Oinleng Khongsni. Napdeng kitei ki 5 ngut kiba la shah bom shah tied ha u Joshi ar ngut na ki ki la mynsaw jur na ki bynta jong ka khlieh bad ka met jong ki. Kitei ki samla ki la iathuh ba ki la shah bom shah tied da u Lathi ha khmat Police station Pynursla. Kitei ki samla ki la iathuh ruh ba katei ka jingjia ka la jia katba ki dang ia shongkai ha ing u paralok jong ki, hynrei kynsan kynsan utei u OC uba la bu-aid u la mih na thanad ryngkat bad ki katto katne ngut ki pulit kiba la synran ia u ki la bom la tied khlem kano kano ka daw ia kitei ki 5 ngut.
Haba ia kren bad u President ka KSU Pynursla Unit u samla Eleazar Diengdoh, u la ia thuh ba utei u OC u la byrngem byrsit ia kitei ki samla da kaba ong ba lada ki dei lei ki dkhot ka KSU un set kai ia ki kumba 2 ne lai sngi ha thanad. “Ngi pynrem ia utei u OC uba la shu shoh dusmon ia ki samla shnong khlem kano kano ka daw” ong u samla Diengdoh uba la iathuh ruh ba katei ka jingjia ka la jia ha ka por bym don pakhang shnong ne surok miet bad kitei kiba la shah bom ruh kim dei ki dkhot ka seng.
Shuh shuh ka KSU Pynursla ka la kynnoh ba utei u heh pulit ba la bu-aid u dei uba donkti ha ka kam tuh blang bad u la tuh 2 tylli ki blang kiba dei jong uwei u briew uba la shu tip kyrteng kum u Bah Mylliemngap uba na ka shnong Lyngkien.
Ka la don ka jingartatien na ka liang ka seng ia ka rukom shakri jong u Joshi ha ka kam pulit ha kaba ka la kynnoh ba utei u OC u ju ia dei paralok bha bad ki briew kiba khaii tuh sha khappud bad kitei ki briew ki ju ishrai bad buh shun ia ki dkhot ka seng kiba pyrshang ban khanglad ia ki. “Utei u OC u dei uba donkti ruh ha ka kam ia khaii mar tuh sha khappud bad ki heh spah” ong u Bah E.Diengdoh haba ia kren bad u Rupang.