Plie mawnongrim ha Umsawli

Shillong, 8 Nailur:
U Myntri ka Ministry of Textiles ka sorkar United Progressive Alliance (UPA) Kavuru Sambasiva Rao hynne ka sngi Saitjain u la plie ia u mawnongrim ban tei ia ka National Institute of Fashion Technology (NIFT) ha Umsaw li-Mawlong. Ha kane ka sngi ba la don lang u Myntri Rangbah ka Jylla Dr Mukul Sangma, bad kiwei ki heh sorkar.
Haba kren ha kane ka jingplie, u Roa u la ong ba ka tnad ba peit ma u kam don jingeh ban ai pisa ban kyntiew ia ki kam ri khniang ha kane ka jylla.
U la kular ban ai ka jingkyrshan na ka tnad sha ka sorkar jylla halor kane.
U Myntri ula pyntip ba ka Sorkar Kmie kala mang tyngka T. 490 klur kum ka jingpyllait ram na ka bynta ki nong thaiñ jaiñ hapoh ka Ri bad haduh T. 500 klur na ka bynta ban iarap ia kine ki nongthaiñ thaiñ kiba donkam ram.
U la ong ba ka ka kam thaiñ jingthaiñ ka la lah ban aikam haduh 43.31 lak ngut ki briew bad haduh 23.77 lak ngut kila don bynta ha ka jingthaiñ jingthaiñ ha kylleng ki Jylla hapoh ka Ri bad kane kala kyntiew ha ka jingpynmih jaiñ haduh 15% hapoh ka Ri.
U Myntri ula ai jingmut ia ka NIFT ba kan khring ia ki nongthaiñ thaiñ na ki jaka nongkyndong jong ka Meghalaya, kiba la iaksaid ban lah pynim ia ka kam. “Ka Fashion technology ha ka ri jong ngi kam dei shuh ka kam ba leh tang ki briew ba don spah. Mynta ia kane ka kam la lah ruh ban leh da kiba duk hynrei kaba donkam ka dei tang ia ka Sorkar ba kan plie ia ki lad ki lynti” ong u Rao.
Ula kyntu ia ki bor khmih ka NIFT ba kin iatreilang bad ki skulbah jong ki Ri ka pyrthei ban plie lad ia ki samla pule ba kin ioh shuh shuh ia ka jingnang jingtip bad jingshemphang na kine ki skulbah.
U Myntri Rangbah u Mukul Sangma ula ban jur halor ka jingiatehlok hapdeng ka NIFT bad ki nongthaiñ jaiñ jong ka Jylla. “Iaphylliew jingmut bad ki briew sha ki shnong ki thaw. Ngi donkam ban iatehlok bad ki nongri khniang ryndia ki ban lah pynbiang ia ki ksai ryndai khnang ba phin lah pynmih ia ka jaiñ ryndai kaba paka eh” ong u Myntri Rangbah.
U Mukul ula ongba ka Sorkar ka don jingthmu mynta ban thaw ia ki lad ki lynti na ka bynta ban pyntbit ia ki nongthaiñ jaiñ khnang ba kin lah ban synniang bha ha ka liang ka jingpynmih jaiñ napoh ka Jylla.