Pdiang noh ia ka Bill phiah constituency, ong u CEM ia u MR

Shillong, 4 Nailur:
Mynta ka sngi Ba lang ka kynhun jong ki MDC hapoh ka lama jong ka Khasi Hills United De mocratic Alliance (KHUDA) ba la ialam da u CEM ka KHADC u Bah Pyn shngaiñ N Syiem ka la iakynduh u Myntri Rang bah ka jylla u Mukul Sangma ban kyntu ia u ba ka sorkar ka dei ban pdiang noh ia ka Bill phiah MDC constituency thymmai ba la pas da ka Council.
Haba kren hadien ba la mih na kamra u Myntri Rangbah, u Bah Pynshngain u la ong ba la kyntu ia u Myntri Rangbah ban pdiang noh ia ka KHADC Autonomous District (Constitution of District Councils) Rules, 2013 ban pynlah ia ka Council ban pynduh noh ia ki constituency kiba rim shwa ban wan ka elekshon jong ka Autonomous District Council la shem snem.
“Ngi la kyntu ia u Myntri Rangbah katkum ka sub paragraph 7 jong ka Paragraph 2 ka Sixth Scheduled, la kdew shai ba ka Council ka lah ban thaw ia ki rul hadien ban sa ioh sa ia ka jingmynjur na u Lat ka jylla. Ka kyntien ba dei ban ioh jingbit shwa na u Lat shwa ban thaw ia kano kano ka ain, kam shym la kdew satia ha ka Sixth Scheduled”, la ong u Bah Pynshngain.
U CEM ka KHADC u la pynthikna ba ka Council ka la bud ia ki kyndon kumba dei ban leh shwa ban pas ia ka Bill. Ha kajuh ka por, u la ong ba u Myntri Rangbah u la pynthikna ba un peit ia kane ka kam bad un sa ai ia ka rai ha kine ki khyndiat sngi ban wan.
“Ngi kyrmen ba u Myntri Rangbah yn ai ia ka jubab kaba biang kumba ngi kwah”, la ong u CEM ka KHADC.