6 sngi yn tohkit ki pulit, ia 5ngut

Shillong,3 Nailur:
5 ngut na ki 14 ngut kiba la shah kem ha ka kynta pakhang shnong ki Sengbhalang ha ka sngi nyngkong , kin hap hapoh ka jingtohkit kaba 6 sngi jong ki pulit. Kitei ki 5 ngut ki sengbhalang kiba la shah kem kiba kynthup ia u Shanborlang Kshiar, David Ryngki, Wanlambok Wansai, Smallingstar Nongsiang bad u Estiliborn Khonglam , kitei ki san ngut ki dei kiba la dep ban register case hapoh Mawlai Police station Mawlai PS case no.57(9)13 bad Mawlai PS case no. 58(9)13. U SP East Khasi Hills Bah Mariahom Kharkrang u la iathuh ba la rah ia kitei ki 5 ngut sha Ing bishar mynta ka sngi bad ka Ingbishar ka la ai bor ba kin hap hapoh ka jingtohkit kaba 6 sngi.
Lah ban pynkynmaw ba hapoh ki kynta pakhang shnong ba la khot da ki sengbhalang ban pynkhlain ia ka jingdawa ILP, ki la don haduh 14 ngut ki dkhot ki sengbhalang bapher bapher kiba la shah kem ha kylleng ka sor Shillong ha kaba la pynngat ia ki hapoh ka kyndon ain MMPO.