Thung maw nongrim u Mukul, ban shna Kashari ha Nongpoh

Shillong, 1 Nailur:
U Myntri Rangbah ka jylla u Mukul Sangma u la plie ia u maw nongrim na ka bynta tei ia ka iing Kashari ha Nongpoh ha kane ka sngi Saitjain.
U Mukul u la plie ia u maw nongrim ka Ka shari jong u District and Session Judge ka Ri Bhoi District, Nongpoh ha ophis u Deputy Commissioner. La don lang ha kane ka sngi u Acting Chief Justice ka High Court u T Nandakumar Singh, u Symbud Myntri Rangbah Bah Rowell Lyngdoh, u nongaibuit ka sorkar u Bah D D Lapang, u Judge ka High Court Meghalaya, u Justice S R Sen bad u Chief Secretary Bah W M S Pariat nalor kiwei.
U Mukul haba kren ha kane ka sngi u la ong ba ka jingplie ia kane ka iing Kashari kan ai ia ka jingkyrmen ia ki paidbah ban pynioh ia ka jingbishar kaba sted.
U la ong ba ka jingkhlain jong ka synshar paidbah kan shong ha ka jingkhlain jong ka kashari. U la ong ba donkam ban pynlong ia ka Legal Awareness Campaign ne ka jingialap halor ki ain ki kanun ha baroh kawei ka jylla ban pynshlur ia ki briew ban tip ia ki kam ba iadei bad ka ain bad ban don ka jingshaniah.
Kiwei pat kiba kren ha kane ka sngi ki long Bah Rowell Lyngdoh, Bah D D Lapang, u Acting Chief Justice, u T Nandakumar Singh, u Judge ka High Court Meghalaya, u Justice S R Sen, u Chief Secretary Bah W M S Pariat bad ka Deputy Commissioner, Ri Bhoi District, Dr Pooja Pandey.