Kyrshan ka CSWO ia ka Hima Myliem

Shillong, 1 Nailur:
Ka CSWO Central Body hapoh ka jingialam ka Kong Irene Hujon kum ka President, ka la pyn paw ba ka ai ka jing kyrshan ia u Syiem ka hima Mylliem uba la knieh noh ia u Lum Majneh na ki nongkhrong khajna be-ain kiba la kam ialade ba ki dei u President bad Secretary ka Raid Laban Dorbar.
“Ia utei u Lum ne Shillong View Point la pyniaid da kiba kam ialade kum u President ka Raid bad kum u Secretary jong ka Raid Laban (Dorbar). Katkum ka riti synshar ha ka jaitbynriew Hynniew trep, ym ju khot President ne Secretary ia uno uno u briew uba bat ne peit ia ka Raid ne ia ka Hima hynrei dei tang ia ki nongialam ki kynhun seng ba lah ban khot President ne Secretary. Ka Raid Laban Dorbar kam pat don satia ha ka histori jong ka Hima Mylliem bad kumta ym shym la lah ban ithuh ia kitei ki khwan myntoi da ki bor jong ka Hima Mylliem.” Ong ka kong Irene.
Ka kong Irene ka la kynnoh ruh ba kitei ki briew kim don ka bor sngewthuh ba ha kano ka rukom lah ban pynlong ia kawei ka Raid namar ba imat kim pat da sngewthuh bha ia ka rukom synshar shnong ha ka Bri u Hynniewtrep.
Ka la kynnoh ruh ba ki dei ki nongialam bakla ia ki paidbah da kaba khrong khajna na ki duk ki suk ha ka dor T.30 tyngka shi sngi na ki nongdie jingdie bad ki ju khrong pisa ruh na ki kali ba rung ba mih ha utei u Lum.
Ka CSWO ka kyntu jur ia U Syiem ka Hima Mylliem ba un leh da kaba tyngeh bad dei ban buh jingkylli ba shano ki pyndonkam ia katei ka pisa kaba ki la lum beain. “Ka seng ka ai jingkyrshan ia U Syiem bad ia ki Myntri ka Hima Mylliem kiba la leit ban jurip bad ban knieh syndon ia katei ka jaka namar la shem ba kam dei ka hok jong kita ki President ne Secretary ban leh donbor halor katei ka jaka hynrei ka dei ka jong ka Hima hi” bynrap biang ka kong Irene.