Shillong, 30 Naiwieng:
U Pappu Das, u khun jong U Heminder Das, ula kylla long u trai shnong jong ka Shnong Pommura bad ula ioh ia ka jing pyn ithuh na U Sordar Shnong, ha kaba ula ioh ia ka EPIC bad U Aadhar number ruh.
Halor kitei ki jingshisha, kumta ka KSU Mawryngkneng Circle, ha ka Jing ialam u President Samla Reallystar Nongspung, General Secretary u samla Shiningstar Kharbihkhiew, ki la leit ia kynduh ia u Deputy Commissioner, East Khasi Hills district bad ia u Block Development Officer ka Mawryngkneng C&RD Block, hadien ba la lap ba ki briew ba nabar, ki la sdang ban ioh pynrung kyrteng thep vote bad ADHAR Card bad ia katei ka seng ka la lap ba uwei u briew uba kyrteng u Pappu Das 31 snem rta,(RZN0129312),(Sl.no 305) bad (Part no-46) (House no-68),u dei u khun jong ka Heminder Das, ula ioh pynrung kyrteng ha ka EPIC & ADHAR ha shnong Pommura, wat la ka Dorbar shnong kamdon jingtip bad jing ithuh ia utei u briew . Hadien ba la dep wad bniah ka seng ka la lap badei lyngba ka jing ai Syrnod(Certificate) pathar u Sordar jong katei ka shnong ia u Pappu Das ba pynshisha ba u dei u ba lakha bad udei u trai shnong ba pura jong katei ka shnong bad katei ka jingleh jong u Sordar ka shnong kalong ka bymdon nongrim bad kaba buh jingma iaka shnong ka thaw bad iaka jaidbynriew rit paid.
Halor katei ka nongrim ka seng ka la dawa na ki bor ba dei peit ba ki dei ban weng mardor ia utei u briew naka EPIC &ADHAR registration bad ka seng kala ujor katkum ki kyndon bala buh na ki bor badei peit.
Ka seng ka kyntu iaki Sordar /Rangbah shnong ba kim bit ban ai syrnod pathar sha ki briew ba nabar, namar kalong ka jing pynshlur iaki mynder ban wan buhai shnong bad ban dawa ia ka hok longtrai shnong ka jongki. Ha kajuh kapor ka seng ka maham tyngeh ia ki katto katne ngut ki Sordar/Rangbah shnong bad ki Mynnong ki Seng Sain pyrthei (Political Agent) ba suba donkti iarap iaki briew ba nabar ban pynbiang kot pynbiang sla bad ban pynrung ia ki briew ba nabar haka EPIC tang naka bynta ban ioh jingmyntoi shimet, khlem da pyrkhat iaka lawei jong ka pateng jaidbynriew.