Shillong, 22 Naiwieng:
Ka seng treimon sngewbha ka round table Shillong ka la jied ia ka skul Mohan Massar ha Mawprem na ka bynta ban shna ia ka iing skul, bad kiwei ki jingdonkam jong ka skul. Ka jinglut ban shna ia kane ka iing skul kan long T. 2 klur ban pyndep hapoh lai snem.
U Arnav Chachan, u chairman haba kren sha ki nongthoh khubor u la ong ba ka seng ka la dep leh teng ia ka skul Balika Vidhalaya School, Keating Road, Shillong ha kaba ka la shna ia ka painkhana, bad moramot ia ka iing kaba la pei la jot jong kane ka skul.
Ban pynmih pisa ia kane ka kam, u la ong ba ka seng kan sa pynlong ia ka Brain Humour ban wan pyni da u nongleh danda ba pawnam u Zakir Khan ha ka 25 tarik Naiwieng ha u Soso Tham Auditorium, Shillong.
U la ong ba ia ka jingjied ia ki skul la leh hadien ba la bishar bniah ia ka jinglong jingman jongki, khamtam kito kiba la shah ieh khunswet.