26ngut kem dkhar ka KSU

Shillong,29 Nailar:
Ka KSU Mawlai Circle mynta ka sngi ka la ioh ban kem haduh 26 ngut ki bar jylla katba ki dang don ha ka jingtrei jong ki na ka bynta ban tei ia kawei ka Ing mane jong ka Balang Presbyterian bad kawei ka Ing Skul jong ka Balang Catholik. Haba ia kren bad u Organising Secretary ka KSU Mawlai u Bah A.Basa iawmoit u la ong ba la kem ia kitei ki dkhar namar kim don ki kot ki sla kiba biang ba kin wantrei ha kane ka jylla. La iathuh ba kitei ki dkhar baroh ki dei na Assam kiba la wan ban trei bad uwei u kontraktor uba la shim kontrak ban pyndep ia katei ka jingtrei ki phadar bad pastor.
“18 ngut la kem na Mawkynroh bad 8 ngut pat la kem na Kynton Massar” ong u Bah Basaiawmoit uba la ong ruh ba kitei ki dkhar ki la pyni ia ki kot ki sla kiba ka seng kam lah ban pdiang hynrei kham hadien ki la ong ba ki don ka challan hynrei haduh mynta kim pat shym la wanrah ia katei ka challan bad ka work permit jong ki.
Haba la kylli hato ki phadar lane ki pastor ki la wan tuklar ne-em kum ki trai haba la kem ia kitei ki nongbylla jong ki, ka KSU ka la ong ba kim shym la wan tuklar satia ia ka jingkem ia kitei ki dkhar.Lah ban kdew ba ka jingkem dkhar ha Mawlai kam dei satia ka sien kaba nyngkong hynrei ka dei ka jingjia kaba ki sengbhalang bad ki paidbah ki ju bat ia ki poi-ei ba wan iaid lynti bad kiba wan trei sha katei ka jaka.