La ju ioh sngew ba ki nongrep ki ju ud ba ka sorkar kam ju pynbiang ia ki jaka buh mar hynrei kan long ka jingphylla ban shem ba kam long kumta bad katkum ka jingtip ba la ioh lum, ka jaka set mar ne ka cold storage kaba don ha Mawiong, la hap ban pyndonkam noh da kumwei bad ka daw ka long ba ki nongrep kim treh ban leit buh ia ki mar rep.
Lah ban ong ba ka jingpynkhreh ka sorkar ia ka cold storage ha Mawiong ka long sepei kai namar ki nongrep kim pyndonkam ia katei ka jaka ba la shna khnang na ka bynta ban buh ia ki jhur ki jhep jong ki.
Ha u 12 tarik u Nailar 1996, la sdang ka iadie ia thied ia u phan ha katei ka iew. Ka jingdon jong ki nongrep rep ha katei kapor kalong kaba shongshit bha. Da ka jingtreikam katei ka iew Dielang la pynlong ka jingiadie ia thied da u synsar, sla tyrpad bad u Phan.
Katkum ka jingtip ba la ioh u Rupang, namar ka jingbym wan ki nongrep ban pyndonkam ia katei ka jaka buh, ka sokar ka la hap ban shu ai wai noh ha ki riew shimet ban pyndonkam ban set ia kiwei ki marbam kum ki jingdih bad kiwei de.
Ia katei ka jaka la shna khnang na ki bynta ki nongrep ban buh ia ki mar rep kum u Phan u jhur bad kiwei kiwei de. “Hynrei bun na ki nongrep kim kwah ban buh ia ki mar jong ki ha katei ka jaka bad ka sorkar ka la ai wai noh ia ki riew shimet ban buh ia ki mar bam jong ki”,la ong uwei u ophisar sorkar.
Katei ka cold storage la buh khnang ban iarap ia ki nongrep ban lait na ka jingshah ban bein ha ki mahajon kiba thied dor tad bad haba ka iew ka hat kam long ban die namar ka jingtad palat, bad ha kum kane, ki lah ban leit buh shwa ia ki mar rep jongki bad kin sa die pat hadien ba la kham biang ka dor.
“Ki nongrep ki bym pat kwah die ia ki mar ne lada ki mar ki hiar dor ki nongrep ki lah ban buh shwa ha katei ka jaka bad lada ki buh ia ki mar jong ki ki hap ban siew ha ka dor kaba rit”, la ong.
Ha kane ka cold storage lah ban buh haduh kumba 3 bnai ei ei khlem pyut.
Ia kane ka cold storage la plie ha u snem 2001 da u Bah EK Mawlong bam kwai ha duwar u Blei, ha ka por ba u dang long kum u Myntri Rangbah jong kane ka jylla.
Ha kane ka jylla bun ki nongrep phan hynrei kaba sngewlynngoh ka long ba ki nongrep kim pyndonkam ia katei ka jaka bad la shu sepei kai.
Ha ka sngi saitjain haba u nongthoh khubor u la leit ban jurip ia katei ka jaka la lap ba ia katei ka jaka la pyndonkam da ki nongkhaii ha kaba ki buh ia ki mar bam mar dih jong ki. La iohi ruh ba ki trok ki la wan ban pynhiar ia ki mar ban set ha katei jaka.
Ka sorkar naduh nyngkong ka la buh ia kane ka iew khnang ban iarap ia ki nongthied bad ki nongdie. Ka sorkar ka la buh khnang ia kane ka iew khnang ban pyllait ia ki jingshah khniot bein jong ki mar rep ha ka dor ka mur.
Phi don ban ong eiei?