Mynta 3baje, yn iakren ki Sengbhalang bad U Mukul Sangma Lada ym ioh ILP, 30tarik, yn sdang ki jingiakhih paidbah

Shillong,28 Nailar:
Lashai ka sngi ki sengbhalang bapher ba pher, kiba kynthup ia ki 10 seng kin leit ban ia kyn duh ia u Myntri Rangbah ka jylla u Dr.Mukul Sang ma ha ka por 3 baje janmiet ban ia kren halor ka ILP bad kumba la mih ki jingkren ha ka jingialang paidbah kaba la long ha Motphran, la sngewthuh ba ka jingiakynduh Mukul lashai ka sngi kan long beit thik ban ia kren tang ia ka ILP. Ka sur kaba la mih na ka jingialang ha Motphran la sngewthuh ruh ba lashai ka sngi ka dei ka rai ba khadduh jong ki seng bhalang ban ioh ia ka ILP, ne ban ia khih paidbah naduh ka 30 tarik myntau bnai.
Lah ban pynkyn maw ba ha ka jingialang kaba ki sengbhalang ki la pynlong ha Motphran ha ka 16 tarik mynta u bnai, ki la pynsangeh noh ia ka jingthmu jong ki ban iaid paidbah sha Secretariat na ka daw ka jingshah khot jong ki ha u Myntri Rangbah ka jylla u Dr.Mukul Sangma ban ia kynduh ha ka 29 tarik mynta u bnai.
Ka High Level Committee halor ka ILP kaba la lam khmat da u myntri Rangbah ba-ar jong ka sorkar barim ka jylla u Bah Bindo M Lanong, ha kaba u Chief Secretary ka jylla ruh u long u dkhot , ki nongtrei sorkar bad ki sengbhalang ki la shim ia ka rai ha ka komiti jong ki ba donkam ban pyntreikam noh ia ka ILP, hynrei ia katei ka rai jong ka HLC, la kyntait da u Myntri Rangbah ka jylla u Dr.Mukul Sangma da kaba kynthoh ba ka ILP ka pynwit ia ka roi ka par, ka kam shang pyrthei bad kiwei pat ki jingpynkylla dur thymmai ia ka jylla.
Haba iakren bad U bah Joe Marwein, President ka FKJGP, ula pynsngew ba ka jingiakren lashai ka sngi, kan long beit halor ka mat jong ka Inner Line Permit Bill bad ula ong ruh ba ka jingiakren ruh kan dei beit tang bad u myntri rangbah, namar ba u ong “Kiwei kim lah ban rai ia kano kano ka phang”. “Ym dei shuh ban iakren ia kawei ka ar” ong shuh shuh U bah Marwein.
Haba la kylli biang pat, ba lada ka ILP, ka long em lashai ka sngi, U bah Joe, ula ong “Ka jingiakhih kan iaid beit” bad haba la kylli, la kan sdang naduh ka 30tarik mynta u bnai, utei u rangbah, ula ong ba ia katei, yn sa ia pynbeit, tangba ula pynthikna ba ka jingiakhih kan iaid beit shakhmat.