Nongpoh, 26 Risaw:
Ka Joint Action Committee (JAC) jong ki ar-tylli ki kynhun nongniah kali kamai kiba kynthup ia ki nongniah Auto bad Maruti, Pahambir Unit, mynta ka sngi ki la pynpaw ia ka jingsngewkhia halor ka jingbymshimkhia da ki nongpyniaid ia ka kali ia ki Bus saw, ia kaba la buh khnang ha katei ka thain na ka bynta ban kit ia ki khynnah skul.
Katkum ka jingia-thuh da ki nongialam jong katei ka JAC kiba kynthup ia u Bah Cyril Maring, uba long kum u General Secretary, la ong ba katei ka Bus saw kaba la phah kyrpang ha katei ka thain ka long ban kit tang ia ki khynnah skul, hynrei ha ka jingiohi jong ki la lap ba ia katei ka Bus la pyndonkam bakla namar kam shym la pyndep katkum ka kamram kaba la bynshet.
Kumta na ka liang ki nongialam jong katei ka JAC ki la kyntu ia ki nongpyniaid jong katei ka Bus saw kaba don ha katei ka jaka, ba ki dei ban shimkhia bad pynbiang ia ka por leit buh bad leit shaw ia ki khynnah skul kiba leit ha ka skul bapher bapher ha Nongpoh.