Yn shah noh ban pyni phlim Khasi

Shillong, 27 Nailar:
Ka seng ki nongpyn mih phlim hapoh ka lama Meghalaya Film Makers Association (MeFilMA) hapoh ka jingialam jong u Bah Commander Shang pliang President mynta ka sngi ki la leit ban iakynduh ia u Chief Secretary ka jylla ha kaba la buh ruh ia kiba bun ki mat jingdawa kynthup ka jingdawa ban pyllait noh ia ka jingpynsangeh ban pyni phlim khasi ha ki Cinema Hall ha Shillong.
Ki mat jingdawa kiba ka seng ka leit rah mynta ka sngi ha Chief Secretary ka long na ka bynta ban dawa ban shna ia ki Hall ha Shillong bad ha ki District Head quarter bapher bapher ha ka jylla ki ban long beit thik tang na ka bynta ban pyni ia ki phlim Khasi. Ka seng ka la pynpaw ha u Chief Secretary ba kumba ka long mynta ka jingpyni ia ki phlim khasi ka long beit thik tang ha Bijou Cinema Hall ha Shillong bad kane ka pynduna ia ka jingmih haba shna ia ki phlim Khasi. Ka seng ka la pan ruh ia ka jaka pynieng kali ha Anjalee na ka bynta ban shna hall pyni phlim khasi.
Haba iakren bad u Bah Commander Shangpliang President jong ka MeFilMA u la iathuh ba ka seng ka la dawa ruh na ka sorkar ba kam dei ban ohdor haba leit ring phlim ha ki jaka sorkar, la dawa ruh ba ka sorkar kan ai jingiarap bai bam ia ki samla kiba leit pule ban pyntbit ha ka liang kaba iadei bad ka jingpynmih phlim.
Kiwei pat ki jingdawa jong ka seng ka long bym oh khajna na ki phlim Khasi kumba la leh ia ki phlim kiba la pyni ha Dreamland Cinema, ban iarap subsidy halor ki phlim khasi ban kyntiew ia ka jingpynmih phlim khasi bad la kyntu ruh ia ka sorkar ban kan iarap na ka bynta ban shna ia ka Film City ha ka jylla da ka jingiatreilang jong ki nongpynmih phlim Khasi.
Na ka liang jong u bah Commander Shangpliang u la iathuh ba u Chief Secretary u la pynpaw ia ka jinglong lakloi na ka bynta ban bishar bniah halor kitei ki mat jingdawa jong ka seng. Ha kaba iadei bad ka jingkhang ban pyni ia ki phlim khasi u bah Shangpliang u la iathuh ba, u Chief Secretary u la kular ban sa pyllait noh shen ha kine ki khyndiat sngi ban wan.
U la ong ba ka seng ka ai khublei halor ka jinglong la kloi jong u Chief Secretary ban pyllaitpor ban iakynduh ia ki nongialam jong ka seng bad kumjuh ruh halor ka jingai jingkyrmen ban pynurlong ia ki mat jingdawa jong ka seng.