Nongstoiñ, 13 Risaw:
Ki nongtrei sngi jong ka tnad MeECL Nongstoiñ, hapoh ka lama jong ka MeECL Progressive Workers Union, mynta ka sngi kila ia mih paidbah ban ia ieng ha khmat ka phyllaw jong katei ka ophis, da kaba ia deng lama iong ha ryngkat ka jingiarah ia ki placard ban pyni ia ka dak jong ka jingpyrshah bad ruh ban kyntait ia ka jing iateh, kaba la pynmih da katei ka tnad na ka bynta ki nongtrei casual.
Katei ka jingpynmih jong ka tnad MeECL ia katei ka jing iateh, na ka bynta ki nongtrei Casual kala ktah ia kumba 70 ngut ei ei ki nongtrei sngi, ka kynthup ia kiba trei Jugali, Meter Reader, Bill clerk, DEO, Peon, Cleaner, LD bad kiwei kiwei.
Ka kong M. Cheerfullness Iawphniaw, kaba trei kum ka Bill Clerk ha katei ka ophis bad kaba dei ruh ka dkhot jong katei ka Union, haba iakren bad ki nongthoh khubor ka la ong ba ka MeECL, ka la leh beiñ ia ki nongtrei Casual kiba la trei bun snem bad ha ka jingshisha ka MeECL, ka la dei ban ai ia ki, da ka jingtrei ba pura, ym da ka jingiateh kaba shipor.
“Hadien ba ka MeECL ka la pynmih ia katei ka order contract agreement ha ka 29 tarik August mynta u snem na ka liang jong ngi kum ki nongtrei casual hapoh ka lama jong ka MPWU ban pyrshah ia katei ngi la thoh ruh sha u Chairman cum Managing Director (CMD) ha kaba ia ka jingthoh kaba nyngkong ngi la phah ha ka 12 September 2017 bad ngi la phah biang ruh ia ka jingthoh ban pynkynmaw ha ka 20 tarik bad 3 tarik ngi ai biang sa kawei ka jingthoh kaba ngi la ai por ba un jubab hapoh ka 10 tarik mynta u bnai hynrei haduh mynta u khlem jubab hynrei u khlem jubab haduh mynta bad u khlem khot ruh sha ka miej jong ka jingiakren” ong ka kong M. Cheerfullness Iawphniaw.
Ka kong Iawphniaw, ka la ong ruh ba dei halor ka jingbym jubab jong u CMD bad ka Management jong ka MeECL, hadien ba la kut noh ka jingai por na ka liang jong ki kum ki nongtrei casual, ki la ia mih paidbah ban pyrshah jur ia katei ka jing iateh ba shipor bad kyntait ruh ban soi ia katei ka jingiateh.
Shuh shuh ha kaba iadei bad ka jingpynjlan ia ka por treikam jongki bad ban ban ioh tulop, ka la ong ruh ba ka MeECL ka la shu pynkut jubor ia ki naduh ka 31 tarik Nailar, katba kaba sngew lyngngoh ka long ia ka jingleh klumar jong ka MeECL kaba la long shaba palat ha kaba iadei bad ka jingioh tulop, namar ha u Nailur, ki nongtrei sha Garo Hills District, ki don kiba ioh pura ia ka tulop bad don ruh kiba ioh tang shiteng, katba sha Nongstoin pat kim shym ioh satia.