Mynta ka sngi deng lama iong “ba bitar Laloo ki nonghikai”

Shillong, 26 Nailar:
Ki nonghikai skul bad kolej bym dei jong ka sorkar jylla kin pynlong ia ka jingdeng lama iong lashai ka sngi, kum ka dak ka jingpyrshah ia ka jingad lukhi u Symbud Myntri Rangbah ka jylla ba peit ia ka pule puthi u Dr Roytre C Laloo.
Hapoh ka lama jong ka JACATAM, ki nonghi kai skul bad kolej ha kane ka jylla, ki la rai ban pynlong ia ka jingiakhih namar ka jingkuman bad atlukhi u Symbud Myntri Rangbah khlem khot iakren wat ha ka jingshisha ki la kyrpad donburom ia u la bun bnai haduh mynta.
Lashai ka sngi ki nonghikai watla kin leit sha ki skul ban shim klas hynrei, kin deng lama iong kum ka jingsdang ka jingiakhih bad ha ka 29 tarik kin pynlong ia ka jingiakhih da kaba leit sha klas khlem shim klas bad ha ka 3 tarik Nailur ban wan, kin pynlong ia ka jingiakhih da kaba shim shuti paidbah baroh.
Na ka liang ki nongialam ka JACATAM ki la ong ba ka jingleh jong u Dr Laloo ban khlem khot iakren ia ki nonghikai kiba la kwah ban iaphylliew halor ka jinglong jong ka pule puthi bad ka jingeh jongki, ka pyni ba um khein snep ia ki nonghikai ha kane ka jylla.
Ka JACATAM ka dei ka shatri jong ki 10 tylli ki seng jong ki nonghikai skul bym dei sorkar kynthup naduh ki lower primary haduh ki kolej.
Kham mynshwa ka sorkar ka la khot iakren ia ki nonghikai ha ka 23 tarik Nailar bad ka commissioner bad secretary ka pule puthi hynrei na ka liang ki nonghikai kim treh ban leit iakren namar ba ki la ngiah ban iakren bad ki kwah ban iakren beit bad u Symbud Mynti Rangbah ka jylla uba lah ban shim ia ka rai.