Ka jingduh ia ka Elaka Nongjngi

Jowai, 26 Nailar:
Ha ka kyrwoh khu bor ba la pyllait da u Publicity Secretary ka Elaka Nongjng u bah Riyoo Pulang, u la ong ba ka jingkhlad bad ka jingduh noh ia u Doloi ka Elaka u ma Lyngngong Snieh, ka long ka jingduh bakhraw ia baroh kawei ka Elaka khamtam ia ki pud ki sam bad ka synshar ka khaddar kumjuh ruh ia ka niam ka rukom ka dustur ka riti bad kiwei de.
Kumban shu pyn kynmaw ba u Doloi Lyngngong u dei uwei na ki Doloi u ba la bat slem tam ia ka kam uba la shimti ia ka kam naduh u snem 1964 kaba la kynjoh mynta la kumba 50 snem. U Doloi Lyngngoh u la khlad noh na kane ka pyrthei ha ka 25.08.2013 ha ka rta kaba 96 snem bad yn pyndep ia ka niam ka rukom ha ka 27.08.2013. U bah Riyoo u la ong ruh ba une u Doloi u dei uba trei hok ia la ka kam ba la bynshet ha u bad u long u briew u ba kloi ban ia rap ia kino kino ki jingeh ba ki khun ka Elaka ki shem jingeh. Kum u Pa Doloi wat lada u trei haduh ka rta kaba la heh la san ruh hynrei u dang lah ban pyndep ia ka kam ha ka jingim jong u ban shakri ia ki khun ka Elaka.
Na ka liang ki dkhot ka Elaka ki la kyntu ruh ia ki khun ka Elaka ban ia pyntngen lang ia kiba ha iing ha sem jong u Doloi, ban pyni ruh ia ka dak jingsngewlem ha kum kane ka por, ban pyni ruh ia ka jingiatylli bad ka jingieit kum ki khun jong ka Elaka Nongjngi. Na ka liang ka Elaka kum ki rangbah shnong ki nongkit kam khamtam eh na ka liang ki dkhot ka Elaka ki la phah ka jingsngewlem sha kiba haiing ha sem jong u Doloi bad kumjuh ruh ia ki kur ki jait bad ki kha ki man jong u kumjuh ruh ia baroh hi ki khun ka Elaka Nongjngi halor ka jingduh noh ia u Pa Doloi jong ka Elaka.