Nang jur jingdawa Garoland

Shillong, 26 Lber:
Ka Garo Hills State Movement Committee (GHSMC) lem bad ka Garo National Council (GNC) ka la pynjur ia ka jingiakhih ban dawa ia ka jylla Garoland da kaba pynlong ia ka jingiashong kyllain myngngor ha Tura, Williamnagar bad ha Baghmara. Ha kane ka jingiashong kyllain myngngor, ki samla pule, ki paidbah ki la iashim bynta.
U general secretary ka GHSMC u Augustine R Marak u la ong ba ka jingiashong kyllain myngngor mynta ka sngi, ka long kaba jop bad yn bteng ban iai dawa ban ioh ia ka Garoland. U la ong ba ki nongpyniaid ia kane ka jingiakhih ki khlem khot ia ki khynnah skul, ki samla pule.
Lah ban kdew ba u Deputy Commissioner ka West Garo Hills district u la mana ba ki khynnah skul, ki samla pule kim lah ban shim bynta ha ka jingiakhih da kaba ai daw ba ka Right to Education Act ka kdew shai ia kane.
“Ngim pynbor ia ki khynnah skul, ki samla pule ban wan iashim bynta ha ka jingiakhuh hynrei mynta ki samla pule jong ki kolej ki la wan shim bynta ha ka jingiashong kyllain myngngor”.
Ka GHSMC ka kynthup ia ka Achik Student’s Welfare Association (ASWA), Tura Government College Students Union (TGCSU), All India Garo Union (AIGU) bad ki riew rangbah ki la pynlong ruh kham mynshwa ia ka jingiashong kyllain myngngor kham mynshwa ha ka 6 tarik bad ha ka 7 tarik ha baroh san tylli ki district jong ka Garo Hills.