Shillong, 17 Nailur:
U Secretary ka HSPDP Mawkyrwat u bah D.Snaitang u la ong ba ka Party HSPDP na Mawkyrwat ka la shim ia ka rai ban ym kyrshan ia u kyrtong jong katei ka seng u bah Renikton Lyngdoh Tongkhar bad u la kynnoh ba ka jingai tiket ka HSPDP ia u bah Renik ka dei tang ka jingleh donbor khlem ka jingmynjur jong ka Area Unit. U bah Snaitang u la ong ba u bah Renik um pat dei satia u dkhot jong ka HSPDP bad um pat long dkhot hapoh ka Primary Unit watla ki nongialam katei ka seng ki la bthah ia u bad ia ki briew jong u ban pyndap phom ruh.
Shuh shuh utei u Secretary jong ka HSPDP Mawkyrwat, u la ong ba u bah Nolipstar Lyngdoh um dei satia u President jong ka HSPDP Mawkyrwat kumba u la kam, hynrei u President u dei u bah M.G Marweiñ, bad ia ka kyrteng jong ki nongkitkam katei ka seng ka la ong ba ka la dep phah ruh sha u President rangbah jong ka Party.